Conciertu de JP Harris y John R. Miller cola violinista Chloe Edmonstone n’Avilés

El primer ciclu de Factoría Sound de 2023 conclúi esti miércoles, 29 de marzu, coles actuaciones de los estadounidenses JP Harris y John R. Miller. Van tar acompañaos de la violinista Chloe Edmonstone, a les 21 hores na Factoría Cultural.

JP Harris y John R. Miller alcuéntrense de xira per España. Xuntos diéronse a la xera de rescatar la tradición del “american songbook” col que los sos cantares fúndense nos fondos raigaños americanos. Dambos van actuar por separáu, acompañaos al violín por Edmonstone, guardando para’l final un momentu especial, nel que los trés van xunir sobro l’escenariu de la Factoría, al más puru estilu de la música tradicional americana de raigañu.

Harris, acompañáu del so banjo, ta presentando’l so nuevu trabayu “Dreadful Wind & Rain”, nel que celebra los sos cantares favoritos de los Apalaches. Procedente de Nashville y consideráu como unu de los meyores cantantes country, nel so nuevu álbum cunta hestories d’asesinatos, demonios, adoraciones y amores perdíos, que rescaten la tradición oral de los antiguos cantares.

La música de Miller, influyida pol soníu Tulsa de J.J. Cale, ye un encruz únicu de folk, country-blues y rock and roll, nel que les harmoníes templaes y los violinos marquen el camín. Depreciated, el so álbum debú como solista, amuesa la so relación col valle de Shenandoah, Virginia, onde se crió y convida a conocer la mente del artista.

Coles actuaciones de dambos, rematen los conciertos programaos pa esti trimestre que volvieron poner a la Factoría Cultural d’Avilés nel mapa de la música internacional. D’esta forma, consolídase la Factoría Sound como estandarte del esfrute del meyor música nel norte d’España.