Conciertos folk nel Parque Hestóricu del Navia

Los conceyos del Parque Históricu del Navia, en collaboración cola Oficina de Coordinación Cultural y Llingüística de la Fundación Parque Hestóricu del Navia, preparen una serie de conciertos colos grupos y solistes del cd editáu dende esa mesma Oficina nel añu 2010.

Les actuaciones, cofinanciaes pola Conseyería de Cultura y Turismu del Principáu d’Asturies y los conceyos de la contorna, vencéyense a dellos actos populares celebraos en cada unu de los conceyos participantes. D’esta miente realícense, dende’l pasáu 8 d’agostu, diversos conciertos nos que puede vese a artistes como la solista de Puertu Veiga, Elisa, o grupos como los bualeses Mezá, los franquinos Cádaba o’l grupu de Xosé “Ambás” y los suyos, Tuenda.

El próximu xueves 25 d’agostu, a les 22:30 hores, la XIX edición de la Feria Campomar, en Tapia de Casariego, va acoyer a los franquinos Cádaba, al igual que’l sábadu 3 de setiembre na celebración del Día de Campu en Folgueiróu, Eilao. La Fiesta de los Dolores de Villayón, el 16 de setiembre, va ser escenariu pa l’actuación del grupu Tuenda ente que, el 24 de setiembre, A Caridá va acoyer a los sos paisanos Cádaba na celebración de la quincena cultural previa a les fiestes de San Miguel. Finalmente, el grupu de Boal Mezá, va tener oportunidá d’actuar mientres la celebración de la Festa del Viño en Pezós el sábadu 15 d’ochobre, y pela so parte, la Feria del Miel de Boal, va acoyer de nuevu al grupu Tuenda na tarde-nueche del sábadu 29 d’ochobre.