La Concha d’Oru va pa ‘The disaster artist’, de James Franco

El director y actor estadounidense James Franco ganó la Concha d’Oru del Festival de San Sebastián cola so película The disaster artist, homenaxe al peculiar fracasu collecháu por Tommy Wiseau nel añu 2003 col so filme The room: una cinta concebida como drama pero convertida en comedia, de puru malu, y aportada colos años n’oxetu de cultu kitch.

La española Handia, rodada en euskera y vasca coles mesmes pola so confección y pola hestoria que cunta, mereció la reconocencia especial del xuráu: daqué según un segundu premiu que los xueces tienen la opción de conceder.

L’arxentina Alanis ye la tercer obra destacada d’esta sesaxésimu quinta edición de Zinemaldi, nesti casu con dos Conches de Plata: la de meyor dirección para Anahí Berneri – convirtiendose na primer muyer que consigue esti galardón nos 65 años del festival donostiarra- y la de meyor actriz para Sofia Gala Castiglione. Como meyor actor foi escoyíu’l rumanu Bogdan Dumitrache pola so actuación en Pororoca.

En The disaster artist, la gran ganadora del Festival, el mesmu James Franco encarna al “rarito” Wiseau, según descripción del cineasta: un tipu inconsciente de les sos llimitaciones qu’atopa nel tamién inadautáu aspirante a actor Greg Sestero –interpretáu pol so hermanu, Dave Franco– al perfectu cómpliz de los sos despropósitos, sustanciados nel catastróficu, surrealista y hilarante rodaxe de The room.

Handia, premiu especial del xuráu, ye pela so parte una cuidada producción sobro la hestoria del xigante d’Altzo, personaxe real de resonancies mítiques y llexendaries que nació nun caserío del País Vascu nel sieglu XVIII y a los venti años empezó a crecer de manera escomanada.

El premiu al meyor actor recibiolu’l rumanu Bogdan Dumitrache pola so interpretación d’un padre que la so vida y la de la so familia sufren un entorno cuando él pierde a la so fía Maria nel parque, un domingu cualesquier.

Una especie de familia, del arxentín Diego Lerman, llévase’l premiu de Zinemaldia al meyor guión. Trata del dilema moral que xuna doctora deseosa d’adoptar un neñu, Malena, interpretada pola española Bárbara Lennie, encara cuando-y faen ver les condiciones más que dudoses de procesu de subrogación. Y La vida y namás, rodada n’Estaos Xuníos pol español Antonio Méndez Esparda, llogró’l galardón de la crítica pol so frescu de la vida nun barriu afroamericano de Florida.