Colunga estrenó yá’l Centru d’Interpretación del Gaiteru Lliberdón

El pueblu d’adopción del célebre gaiteru asturianu Ramón García Tuero, más conocíu como’l Gaiteru Lliberdón, ñacíu n’Arroes (Vilaviciosa) en 1864 y fináu en Lliberdón (Colunga) en 1932, yá cunta col centru d’interpretación de la so obra y vida. Inauguróse’l día 7 de xunetu cola presencia del viceconseyeru de Promoción Cultural, Jorge Fernández León, y l’alcalde de Colunga, Rogelio Pando, acompañáu d’otros miembros de la Corporación Municipal, familiares del Gaiteru Lliberdón encabezaos pol so nietu Juan Miranda, los miembros habituales del Xuráu del Certame de Gaita Asturiana Premiu Gaiteru Lliberdón (Luis Estrada, Javier d’Arroes y Vicente Prado «El Pravianu») y otres personalidaes rellacionaes col mundu de la música tradicional asturiana.