Portada Conceyos La Factoría Cultural celebra los 20 años de la Selmana d’Arte Contemporaneo AlNorte

La Factoría Cultural celebra los 20 años de la Selmana d’Arte Contemporaneo AlNorte

by redacción asturnews

La Selmana d’Arte Contemporaneo d’Asturies, AlNorte, celebra nesti 2021 el so XX aniversariu y un añu más, la Factoría Cultural d’Avilés ye protagonista tantu na actividá como nes celebraciones, cola organización d’alcuentros, talleres y esposiciones, dende esti llunes, 4 d’ochobre, hasta’l vienres 8.

Esti mesmu llunes 4, la Factoría entama la mesa redonda “Perspectiva de xéneru con poética alnorteña”. Participen trés destacaes artistes asturianes d’ampliu currículum, Cristina Bustu, Noemí Iglesias y Elisa Torreira, y va cuntar cola moderación de la comisaria artística Natalia Alonso Arduengo. Va Empezar a les 19.00 hores, nes instalaciones del centru.

Mientres la mesma selmana, pero’l vienres 8, el tamién artista asturianu Mikha-ez, doctor en Belles Artes pola Universidá de Salamanca, y Master n’Hestoria del Arte Contemporaneo y Cultura Visual pola Universidá Autónoma de Madrid, va dirixir na Factoría’l taller “Un llibru de piedra sobro piedres”, na que va esquizar al pie de los y les participantes les posibilidaes creatives que brinden les técniques del grabáu láser y la risografía. va desenvolver de 16.00 a 20.30 hores.

Un añu más, la Factoría entama’l Certame d’Arte Infantil Asturies Plástica. Esti llunes 4, a les 17.30 hores, va inaugurase, nel centru cultural de l’avenida de Portugal,  la esposición coles obres realizaes nos talleres infantiles que tuvieron llugar na ciudá, nes que participaron 80 mozos artistes de los colexos de Quirinal y San Cristóbal que, dirixíos pola artista plástica Diana Coanda, tuvieron llugar mientres la selmana pasada en dambos centros educativos d’Avilés.

Nel CEIP Quirinal, sol títulu “Xeometría de el Color”, los neños y les neñes de 10 a 12 años, aprendieron a trabayar sobro técniques mistes. Pela so parte, nel CPEE San Cristóbal participaron neños y neñes de 14 a 16 años, nun Taller d’Interpretación Artística sobro la escultura Foca, que s’atopa n’el mesmu centru. A la esposición va allegar tantu alumnáu como personal de los centros participantes.

La entrada a la mesa redonda, y a la esposición, ye llibre, tan solo condicionada polos aforos dexaos. La inscripción pal taller yá se cerró, y va cuntar con diez participantes.

Mientres esos mesmos díes, Avilés tamién acueye actividá de la Selmana d’Arte Contemporáno d’Asturies nel Centru Niemeyer, cola esposición Arte AlNorte 2021, que va permanecer abierta hasta’l 14 de payares.

Tamién te podria gustar