Cirque du Soleil estrena en Xixón KOOZA el 1 d’agostu y quédase hasta’l 1 de setiembre

Cirque du Soleil, qu’estrena en Xixón KOOZA, vieno acabante llegar hai unos díes cola so orixinal carpa azul y mariella (Grand Chapiteau) pa presentar la so espectacular producción, KOOZA. L’espectáculu, un estelante y coloríu homenaxe a los oríxenes de Cirque, va estrenase’l 1 d’agostu y va representase nel  Muelle de la Osa (Puertu El Musel). 

La compañía anuncia que se va quedar na ciudá hasta’l 1 de setiembre, ensin posibilidá de prórroga pos tien que siguir la so xira española. Cirque du Soleil nun volviera instalar la so carpa en Xixón dende l’estrenu de Varekai en 2009. Antes, visitaron la ciudá otres dos producciones so la carpa: Saltimbanco (2004) y Alegria (2007).

Tres les represenaciones en Xixón, KOOZA va siguir cola so xira que lu va llevar a Málaga, Madrid y Sevilla.

Sobre KOOZA

KOOZA ye un homenaxe a la tradición circense, Cirque n’estáu puru. Combina de forma maxistral dos tradiciones circenses: les acrobacies más desacobardaes col arte de los payasos. Unu de los personaxes principales, l’Inocente, va amosanos el so camín escontra’l autodescubrimiento al traviés d’un reinu risible de personaxes excéntricos, emociones electrizantes y sorpreses que se salen de lo habitual.

Con un elencu internacional de 50 acróbates, músicos, cantantes y actores, KOOZA ufiértanos emocionantes proezas acrobátiques y l’humor más atrevío, acompañáu d’una banda sonora en directu que funde jazz, funk y ritmos de Bollywood.

Por aciu una esplosión de colores, KOOZA ábrese como una enjoyada caxa de xuguetes prindando la imaxinación del espectador y acelerándo-y el pulsu. El rendimientu humanu n’estáu puru amuésase equí en tou la so rellumanza y fraxilidá.