Berta Piñán promete’l cargu de Conseyera de Cultura n’asturianu

Xusto dos meses dempués de celebrase les elecciones autonómiques, el nuevu Gobiernu echó a andar cola toma de posesión de los sos integrantes y so primer conseyu de Gobiernu col fechu novedosu de la toma de posesión de la Conseyera de Cultura, Berta Piñán, en llingua asturiana.

Los diez conseyeros qu’integren el gabinete de Barbón, dos más que na pasada llexislatura, tomaron posesión de los sos cargos nuna ceremonia que tuvo llugar na Xunta Xeneral del Principáu, en llugar del Palaciu de Presidencia, como yera habitual, y tres de la que se celebró’l primer Conseyu de Gobiernu d’esta llexislatura.

El cambéu, según recordó Barbón, ye un xestu escontra la hestoria d’Asturies, porque los primeros conseyos de Gobiernu, hasta avanzada la década de los ochenta del pasáu sieglu llevaronse a cabu na Xunta Xeneral del Principáu. Y l’enfotu cimeru de facer esto ye amosar la importancia que da el poder executivu al lexislativu.

El primeru en prometer el so cargu énte la Constitución y l’Estatutu d’Autonomía d’Asturies foi’l vicepresidente y conseyeru d’Infraestructures, Mediu Ambiente y Cambéu Climáticu, Juan Cofiñu, que, como mano derecha de Barbón, va exercer los llabores de coordinación de too l’Executivu.

De siguío ficiéronlo el restu de conseyeros: Presidencia, Rita Camblor; Sanidá, Pablo Fernández; Facienda, Ana Cárcaba García; Educación, Carmen Suárez Ciencia, Innovación y Universidá, Borja Sánchez; Cultura, Política Llingüística y Turismu, Berta Piñán; Industria, Empléu y Promoción Económica, Enrique Fernández; Derechos Sociales y Bienestar, Melania Álvarez García; y Desenvolvimientu Rural, Agroganadería y Pesca, Alejandro Calvo.