Portada Educación CCOO, FETE-UXT y STE consideren un ésitu la fuelga xeneral

CCOO, FETE-UXT y STE consideren un ésitu la fuelga xeneral

by asturnet

Los sindicatos CCOO, FETE-UXT y STEs.i consideren un ésitu’l siguimientu de la fuelga xeneral d’educación, celebrada mientres la xornada de güei en tol territoriu nacional y tolos niveles d’enseñanza. L’actividá académica y universitaria del nuesu país paralizóse nesti día, sigún los mentaos sindicatos, ante los repitíos ataques al sistema educativu per parte del Ministeriu.

Un 83% de trabayadores y trabayadores de la enseñanza sumáronse a la fuelga xeneral pa esixir al Gobiernu del PP qu’escuche a la comunidá educativa y cese na so política d’acoso y valtamientu a la educación.

La comunidá educativa vuelve alzar la voz pa defender un modelu que garantice la igualdá d’oportunidaes, que ta siendo gravemente atacada polos continuos retayos educativos; pola perda de derechos; pa reclamar que la educación sía una prioridá pa los gobiernos; pa esixir que se retiren la LOMCE, el Real Decretu de Beques y ayudes al estudiu; y por que cese la sangrante medría de tases universitaries.

Los sindicatos valoren el compromisu de les families y los estudiantes, que secundaron masivamente la fuelga dexando les aules vacíes, coles mires de denunciar les dañibles consecuencies de la LOMCE, que van agravar entá más les males condiciones escolares y que van incidir de manera directa nel futuru de los mozos.

Na enseñanza pública non universitaria, el llamamientu a la xornada de fuelga foi sofitáu pol 83% del profesoráu; na enseñanza privada alcordada les cifres de trabayadores del sector en fuelga fueron del 35%; y el siguimientu nes universidaes algamó’l 91%.

Tamién te podria gustar