CCOO denuncia que la contratación de profesoráu de Lingua ye insuficiente pa cubrir la demanda de matrícula na asignatura

El cursu entama con una contratación de profesoráu de Llingua Asturiana insuficiente pa satisfacer les necesidaes de los centros educativos. La dotación de personal docente fecha pola Conseyería d’Educación nun respuende nin a los pidimientos de los centros nin a la matrícula rexistrada ente xunu y setiembre.

Poro, parte del alumnáu que solicitó estudiar l’asignatura va vese priváu d’esta posibilidá, lo que supón un incumplimientu de la Llei 1/1998 d’Usu y Protección del Asturianu, que garantiza l’aprendizax d’esta llingua na enseñanza reglada. Ye’l casu del alumnáu de Bachilleratu de 12 institutos d’Enseñanza Secundaria. Depués del periodu de matriculación de setiembre, constatóse que la demanda de Llingua Asturiana nesos centros superaba’l númberu d’hores contemplaes na adxudicación de personal interino d’agostu.

CCOO albidra qu’esta situación ye la consecuencia d’una previsión deficiente y de l’aplicación de criterios d’aforru nes contrataciones. La mayoría de los centros afectaos por esta situación solicitaron una xornada completa de Llingua Asturiana, pero la Conseyería d’Educación concedió-yos media plaza. Nel casu concretu d’un centru, la previsión yá contemplaba 18 hores de clase, que son les que da davezu un docente de Secundaria trabayando a xornada completa.

Los problemes cola previsión de plantíes cinquen tamién a la etapa d’Educación Primaria, onde denegaron xornaes completes a los colexos que queríen ampliar la ufierta de Llingua Asturiana a la Educación Infantil. D’otru llau, el sindicatu recibió informaciones de docentes de Llingua que denunciaron la creación de grupos d’esta área que superaben la ratio máxima establecida pola llei, una práctica que respuende tamién a la intención d’axustar los contratos a medies xornaes.

CCOO condena’l tratu que reciben los docentes de Llingua Asturiana, un colectivu formao básicamente por personal temporal qu’amás soporta una precariedád llaboral mui grande. El cursu pasáu, el 63 % de les places (más del 90% en Secundaria) yeren a media xornada. Esti cursu la proporción subió, algamando’l 81,66 %n’Educación Primaria y el 95,77% n’Educación Secundaria na adxudicación d’agostu.