Cangas acueye la UABRA dende’l 29 xunetu con conciertu inaugural de L-R

Un añu más, l’Academia de la Llingua organiza esti 2019 los cursos de la Universidá Asturiana de Branu (UABRA) que se van celebrar en Cangas del 29 de xunetu al 9 d’agostu. Esti añu hai convocaos, amás de los cursos elemental y avanzáu, el cursu de capacitación pala traducción, unu sobro’l patrimoniu cultural asturianu, un taller d’escritura creativa y otru más d’educación y nueves teunoloxíes multimedia.

Estos Cursos tienen reconocencia oficial per parte de la Conseyería d’’Educación del Principáu d’’Asturies, darréu de l’’acreitación de l’’ALLA como «Entidá Organizadora d’Actividaes de Formación Permanente del Profesoráu». Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies. Los cursos desenvuélvense na Escuela Hogar de Cangas del Narcea en réxime d’internáu y la matrícula entama como siempres el próximu mayu nel llar de l’Academia n’Uviéu y va tar abierta hasta xunu.

A lo llargo de los díes que duren los cursos, van ufrise delles conferencies y conciertos como’l del grupu L-R , el día 31 de xunetu, enantes de colar pal Festival Intercélticu de Lorient, y el conciertu col que van finar les actividaes complementaries de la UABRA 2019, el día 7 d’agostu, alñ cargu d’Acomuna del barruzo. Les conferencies van tar al cargu de Víctor Vázquez sobre l’osu n’Asturies, Cristobal Ruitiña sobro la Televisión pública, Raúl Suevos, alrdoiu de la política de defensa europea, y la direición xeneral de Planificación Llingüística sobre les exes de la política  llingüística.

Los cursos que van desenvolvese descríbense darréu:

CURSU ELEMENTAL DE LLINGUA ASTURIANA (del 29 de xunetu al 9 d’’agostu).

De 60 hores llectives y dirixíu a estudiantes que quieran averase a la conocencia práutica de la Llingua Asturiana. Superaes les pruebes afayadices, los participantes llograrán la certificación de Conocencia Básica de la Llingua Asturiana. Esta Certificación pue algamase tamién pente medies de les pruebes añales (de calter escritu y oral) que l’Academia entama nos meses de xineru y mayu y nes que toles persones interesaes puen amosar la so conocencia práutica del idioma asturianu.

CURSU AVANZÁU DE LLINGUA ASTURIANA (del 29 de xunetu al 9 d’’agostu).

De 60 hores llectives y dirixíu a estudiantes que superaren l’anterior Cursu Elemental o que, al traviés de les pruebes de xineru o mayu, algamaren el certificáu de Conocencia Básica de la Llingua Asturiana. El so oxetivu ye que tola xente, al marxe del so nivel d’estudios, titulación o profesión, pueda llograr una más fonda conocencia práutica de la llingua asturiana.

CURSOS D’’AFONDAMIENTU CULTURAL Y LLINGÜÍSTICU (del 29 de xunetu al 3 d’’agostu).

1. Cursu de Capacitación pa la Traducción al Asturianu (del 29 de xunetu al 3 d’’agostu).
De 30 hores llectives y 15 práutiques. Ta dirixíu a estudiantes que tengan una conocencia avanzada de la llingua asturiana. Esti cursu, que dirixe Cristina Valdés Rodríguez, tien como oxetivu presentar sintéticamente los presupuestos teórico-práuticos que rixen la traducción a una llingua minoritaria. Nel programa formativu tamién participen como profesores Cristina Valdés Rodríguez, Alberto Fernández Costales y Pablo Suárez García.

2. Educación y nueves teunoloxíes multimedia (del 29 de xunetu al 3 d’’agostu).
De 30 hores llectives y d’accesu llibre, completaráse con 15 hores práutiques. El cursu ufierta nueves y prestoses posibilidaes pa que’l profesoráu de Llingua Asturiana d’Educación Primaria y Secundaria pueda acceder a nuevos recursos qu’ufierta la rede y diseñar, darréu d’ello, xeres y actividaes d’aula pal deprendizax oral y escritu de la Llingua Asturiana. El so coordinador ye David Melendi Palacio y nel programa formativu participen davezu como profesores Xulio Berros Reinoso y David Guardado Diez.

3. El patrimoniu cultural asturianu. Un averamientu dende l’enguedeyu de lo tanxible y lo intanxible (del 5 al 9 d’’agostu).
De 30 hores llectives y d’accesu llibre, completaráse con 15 hores práutiques. Esti cursu va empobináu a persones interesaes nel patrimoniu asturianu y la so recuperación.

4. De la lletra al testu: taller d’escritura creativa (del 5 al 9 d’’agostu).
De 30 hores llectives y d’accesu llibre. L’oxetivu d’esti cursu ye averase a la creación lliteraria fen llingua asturiana al traviés de dellos talleres.

Los cursos de dos selmanes tienen una matrícula de 300 euros y les d’una selmana una matríucula de 190. Los gstos inclúin matrícula, agospiamientu con pensión completa tolos díes, llibros y materiales pal aula.