Buika va actuar esta nueche nel Teatru Xovellanos de Xixón

Güei, xueves 27 de mayu, a partir de les 20:30 hores, actua Buika nel Teatru Xovellanos de Xixón. L’artista ye una de les intérpretes españoles más particulares del momentu. Mallorquina d’orixe guineanu, constituyó una verdadera revelación pa los que consideraben que’l flamencu nun tenía yá demasiao qu’apurrir al jazz. Los sos raigaños africanos y el cosmopolitismu ganáu en Nueva York y Les Vegues mientres años cantando en clús, súmense pa otorga-y tol carisma de les grandes.

Debuta con Buika en 2005. En 2006 apaez “Mi niña Lola”, col que se lleva’l Premiu de la Música Meyor Álbum de Música Española; col so tercer trabayu, “Niña de fuego” (producción, arreglos y dirección de Javier Limón) consigue dos nominaciones na pasada edición de los Grammy Llatinos.

“El último trago” ye’l so nuevu discu y ye un homenaxe a la gran Chavela Vargas nel qu’interpreta lo meyor del repertoriu de l’artista.