Portada Música Brandal, Dixebra, Lafu&Rebeca, Misiva y Xera, nominaos al “IV Premiu al Meyor Cantar”

Brandal, Dixebra, Lafu&Rebeca, Misiva y Xera, nominaos al “IV Premiu al Meyor Cantar”

by asturnet

El “Premiu al Meyor Cantar” ñació nel añu 2007 como reconocimientu del Gobiernu d’Asturies a la creación musical en llingua asturiana o gallego-asturianu, y llega esti añu a la so cuarta edición. Acordies coles bases, puen optar a esti galardón les canciones con lletra n’asturianu o gallego-asturianu que fueran comercializaes ente’l 1 de xineru y el 31 d’avientu del 2009, una y buenes sían obres musicales de creación orixinal. Na presente edición, cumplíen estos requisitos un total de 106 temes interpretaos por 21 grupos o artistes.

Un xuráu formáu por espertos en música y llingua asturiana escoyó a los cinco finalistes, que van actuar en directo’l próximu día 20 de febreru, con motivu del Día Internacional de la Llingua Materna, na Gala d’Entrega del Premiu, que va retresmitise pola Televisión del Principáu d’Asturies (TPA). L’actu emprima a les 19.00 hores nel Auditoriu de la Casa de la Cultura “Teodoro Cuesta”, de Mieres del Camín.

Los grupos finalistes na presente edición son:

-Brandal, con “Chueve” (lletra y música de Pedru Pereira). Esta formación, ñacida nel conceyu de Cangas del Narcea y que canta na variedá occidental del asturianu, fai un folk melódicu de calter tradicional valiéndose d’una instrumentación a mediu camín ente lo acústico y lo eléctrico. El discu …Na fonte la canalina, onde s’inclúi’l tema “Chueve” ye’l primeru que publiquen.

-Dixebra, con “El dinamiteru” (lletra y música de Primi Abella). Formación decana del rock asturianu, Dixebra nació n’Avilés en 1987 y hasta’l momentu publicó diez discos nos que’l grupu siguió fiel a les sos premises fundacionales: facer un rock mestizu d’influencies variaes, usar la llingua asturiana y reflectar nes sos lletres la realidá social d’Asturies.

-Lafu & Rebeca, con “El mio sitiu” (lletra y música d’Alejandro Lafuente). El dúu artísticu formáu por Rebeca Velasco y Alejandro Lafuente tien yá una trayectoria llarga na escena musical asturiana. Publicaron trés discos de calter intimista y personal y nos qu’esperimenten con diversos estilos musicales: jazz, folk, funky…

-Misiva, con “La casa’l mieu” (lletra y música de Misiva). Misiva surde nel añu 2007, nel conceyu Grau, como un proyectu musical basáu nel usu d’un punk-rock directu y reivindicativu. El so primer discu, del que fai parte’l tema “La casa’l mieu” apaeció nel añu 2009.

-Xera, con “Tierra” (lletra y música de Xera). Con una propuesta musical y novedosa nel panorama musical asturianu, Xera busca fusionar corrientes entemeciendo elementos electrónicos con instrumentos acústicos casu del bouzuqui, el vigulín o la gaita. Esti discursu musical concretóse hasta’l momentu na edición de dos discos.

L’espectáculu va zarrase cola actuación d’Alfredo González, ganador de la edición anterior. Alfredo González ye un cantautor nacíu en Turón qu’emprimó la so carrera musical al empiezu d’esta década, acompañándose de primeres cola guitarra y depués col pianu. Publicó trés discos.

El grupu o intérprete ganador va representar internacionalmente a Asturies nel Festival de la Canción en Llingües Minoritaries (Liet Internasjonaal), organizáu col apoyu del Conseyu d’Europa, que va facese n’Inverness, la capital de les Highlands escoceses.

Tola información d’ésta y les ediciones anteriores del Premiu al Meyor Cantar va tar disponible nun sitiu web de nueva creación (www.premiumeyorcantar.es) que va ufrir noticies, fotografíes y información de los grupos y cantares finalistes. Amás d’ello un reproductor va permitir sentir los temes que compiten na Gala.

Tamién te podria gustar