Portada Música Bimenes vuelve a convocar el so Concursu de gaiteros y gaiteres mozos

Bimenes vuelve a convocar el so Concursu de gaiteros y gaiteres mozos

by asturnet

El Conceyu de Bimenes ta acabante convocar la XI edición del Concursu de gaiteros y gaiteres mozos de Bimenes, nel que van poder tomar parte tolos concursantes que quieran, siempres a títulu personal y teniendo menos de 21 años el día 30 de xunu del añu 2010. Nel Concursu va afitase un llímite máximu de 10 participantes, que van ser almitíos por rigurosu orde d’inscripción. Sicasí, una vegada superada esta cifra na fase d’inscripción quedará abierta una llista de reserva pa cubrir posibles baxes. La fecha tope pa la receición de les inscripciones ye’l llunes 21 de xunu de 2010 a les 12:00 hores.

La rellación de participantes fadráse pública’l martes 22 de xunu, nun actu abiertu al públicu que se va facer na Casa la Cultura de Bimenes a les 12:00 hores. Nesti actu va sortease l’orde de participación nel certa.

La preselección va facese’l sábadu 26 de xunu, a les 11. La final del concursu va ser el sábadu 3 de xunetu, a les 18:30 hores, en Xenra (Bimenes), nel marcu de la XIV Fiesta de la Oficialidá de la Llingua Asturiana. El concursante tendrá de presentase, como mínimo, 30 minutos enantes del entamu pa interpretar dos temes, ún obligatoriu de la llista dada pol Conceyu y otru que pue ser llibre. Los temes han de ser interpretaos ensin añadíos nin supresiones son Muñeira de Remis, Floréu de Remis, Diana floriada de Veriña, Fandangu puntiáu, Muñeira Barganaz, Xota’l Centru, Muñeira Lliberdón, Alborada’l paxarín, Xota l’Oriente o Carretera d’Avilés.

Los concursantes han d’emplegar como instrumentu la gaita tradicional asturiana (d’un sólu roncón) en cualesquiera de les sos modalidaes. Tamién ye obligatoriu l’usu del traxe tradicional asturianu.

Van dase trés premios, con valos de 300, 200 y 100 euros, y troféu. El Xuráu tará compuestu por miembros cualificaos, designaos pol Conceyu de Bimenes y presidíu pol alcald. El fallu sedrá inapelable.

La propuesta d’inscripción tien de formalizase unviando per corréu los datos personales nuna fueya (onde constarán nome y apellíos, direición y teléfonu de contautu), amás d’una fotocopia del DNI a: Casa la Cultura de Bimenes IX Concursu de Gaiteros y Gaiteres Mozos – Santuyano s/n. CP 33527 – Bimenes.

Tamién te podria gustar