Bimenes celebra la fiesta de la oficialidá esta fin de selmana

El sábadu 3 de xunetu entamen les actividaes de la Fiesta de la Oficialidá del Asturianu, en Bimenes. A les once la mañana, nel prau d’El Padrizu (Rozaes) ábrese la VIII Feria d’Artesanía y Mercáu de Productos Agroalimentarios. Media hora más tarde, un pasacais de los grupos folklóricos Los Yerbatos (Bimenes) y Os Pauliteiros (Miranda del Douro) va percorrer les cais de Xenra hasta la Casona de los Careaga, onde a les 12’00 hores, el cantante del grupu de rock “Dixebra, Xune Elipe, va dar llectura al pregón, siguíu d’una misa n’asturianu, oficiada por José Manuel García de Jesús y cantada por El Corriellu la Pandorga (Bimenes).

Darréu, nel prau d’El Padrizu, en Rozaes, va facese la Puya’l ramu, entamada pola Sociedá de Feries y Fiestes “Nuestra Señora del Rosario” de Santuyano. A la una y media van actuar los grupos folklóricos Los Yerbatos (Bimenes) y Os Pauliteiros, llegaos de Miranda del Douro.

La xornada para al meudía pa celebrar una Xinta popular, con corderu a la estaca y parrillada mixta (costielles, chorizu y pollu) al preciu de venti euros, ya incluyendo pan y arroz con lleche.

Yá de tarde, de magar les cuatro, celébrase un taller de manualidaes pa neños, a cargu de l’Asociación Sociocultural Afayaivos. A les 18’30 hores la música torna a la folixa pa celebrar el XI Concursu de Gaiteros y Gaiteres Mozos. La nueche trai con ella, a partir de les 11, un conciertu de La Bandina la Curuxa, La Tarrancha y DJ – J15.