Avilés y Xixón participaron en Cork nel alcuentru de ciudaes del Arcu Atlánticu

La comenencia de compartir estratexes de política cultural y una axenda común de proyectos, esperiencies y actividaes, foi la base fundamental del alcuentru de ciudaes del Arcu Atlánticu que se celebró estos díes en Cork y al qu’asistieron representantes d’Avilés y Xixón, los dos llugares asturianos que participen del proyectu. L’últimu alcuentru de les ciudaes atlántiques celebróse apocayá en Xixón.

.Na declaración final del alcuentru de Cork afírmase que les ciudaes del Arcu Atlánticu consideren qu’unas polítiques y estratexes culturales ambicioses contribúin a la cohesión económica, social y territorial de la Unión Europea. Pa los miembros d’esti eurogrupu: “les iniciatives culturales establecen un acercamientu ente les naciones y xunea a pueblos y comunidaes diverses d’una Europa ampliada.

Les ciudades d’esti eurogrupu tamién reconocen la importancia de les tradiciones culturales del Arcu Atlánticu “en gran parte vinculaes a la importancia de la so historia marítima” y consideren que “la cultura desempeña un papel esencial nel desarrollu urbanu”. Nesi sen caltienen que los entes locales tienen un papel clave nel desarrollu de los futuros programes culturales, pa les ciudaes atlántiques: “los entes locales son responsables de la promoción de la cultura y del patrimoniu énte los ciudadanos y gocen d’esperiencia nel desarrollu y la xestión de programes diversos que no namás celebren y protexen les tradiciones locales sinón qu’amás introducen proyectos innovadores qu’aporten nueves esperiencies a tola población.

Les ciudaes atlántiques reuníes en Cork espresaron la so esmolición énte’l fechu de que toa “reducción del nivel d’apoyu européu a los proyectos culturales ye perxudicial pa la cohesión y el desarrollu económicu y social del continente”. Pa lo último les ciudaes del Arcu Atlánticu comprométense a establecer una axenda cultural común na que puedan fomentar y desenvolver la creación artística, intercambiar les sos esperiencies y garantizar la movilidá de artistes, esposiciones y obres. Too ello “col fin de desarrollar el conocimientu de la historia y la cultura europees pa contribuir a la so proyección internacional, al diálogu intercultural y a la cohesión social”.