asturnet

Esti xueves 14 de marzu celebróse un conceyu que l’Asamblea de Docentes de Llingua Asturiana y Gallego-Asturiano “pidiere cuantayá” a la conseyera d’Educación Ana González. Al conceyu asistieron cinco persones en nome de l’asamblea y per parte de la Conseyería, amás de la propia conseyera, l’asesor en materia de Llingua Asturiana. L’asambel diz que “foron too bones palabres”. Comenten que la conseyera entamó reconociendo que, “depués del tercer anteproyectu de la llamada Llei Wert, la pelota ta en teyáu del Gobiernu del Principáu d’Asturies”. La voluntá de la so conseyería, afirmó, ye dexar l’asturianu “polo menos como taba hasta agora”, y cumpliendo la Llei d’Usu.

Dende l’Asamblea, amás de sorrayar que la situación actual “ye frutu de l’ausencia d’oficialidá del asturianu”, cosa qu’afirmen, la Conseyera “almitió pero diciendo tamién que d’eso nada”. Los docentes ficiéron-y llegar les reivindicaciones que yá plantegaren nel so momentu na asamblea. A llargo’l conceyu “tomó nota de tolo que-y diximos, y comprometer, comprometióse a poco, anque concretóse más nel tema d’Educación Infantil, no que toca a la so xeneralización”, espliquen. Amás reiteró’l compromisu nesta llexislatura en sacar alantre la especialidá. Sobre’l problema de les ratios que se apliquen nos institutos “quedó en dexalo reflexao na circular d’iniciu de cursu, clarificando que nun se puen aplicar nel casu del asturianu”.

De coses como l’asturianu como llingua vehicular, la criación de departamentos didácticos nos IES, la non segregación del alumnáu, la presencia na PAU, etc. los docentes espliquen que “tomó nota pero nun concretó nada, anque de la segregación del alumnáu sí desplicó que nun conocía esi datu y que-y paecía interesante, yá que ta mui sensibilizada con esi tema”.

Faló tamién de cómo la LOMCE diba suponer un “revolcón curricular” y qu’había que ver en qué midida diba afectar al currículu asturianu, que, según ella, “ye bien curiosu”. De toes maneres, comentó tamién que diba ser el propiu desendolque de la futura llei a nivel autonómicu el que podría valir pa fixar el profesoráu, tanto d’asturianu como de les demás materies.

En definitiva, pa l’Asamblea fueron too “bones pallabres qu’habrá que ver en qué se concreten”. Tamién-yos dixo a los docentes que “nun esperaren “una revolución” nesi tema”. L’Asamble tien claro que “la so capacidá de presión y movilización la que sirva pa obligar a l’alministración a mover ficha nesti tema, como en tantos otros”.

Documentu entregáu a la Conseyera

Dende’l Conceyu Universitariu pol Asturianu (CUPA), ficieron llegar “l’apoyu más firme al coleutivu de docentes d’asturianu énte la delicada situación que tán atravesando nestos momentos a causa del proyeutu de reforma de la llei educativa (LOMCE)”, plantegáu pol gobiernu estatal a traviés del ministru Wert, que, afirmen “podría suponer un ataque a la llingua asturiana, yá que dexa en manes de la voluntá política la situación del idioma nes escueles”.

Entienden que ye necesario también que la Universidá d’Uviéu “muestre’l so apoyu decidíu a esti coleutivu y defenda’l futuru profesional de los docentes que forma, si tenemos en cuenta el perxuiciu llaboral que supondría la desapaición del asturianu de la enseñanza, fechu qu’afeutaría a unos 230 docentes que, amás, atópense nuna situación de precariedá o interinidá”. Tamién insten al actual gobiernu autonómicu a que “s’esmolezca en facer suyes les demandes d’esti coleutivu y de tolos asturianos en xeneral, ya qu’entendemos que munchos mecanismos pa tratar de da-y igua a esti conflictu, defender la aplicación de la Llei d’Usu y Promoción del asturianu, y avanzar hacia’l so reconocimientu como llingua oficial pueden dase dende Asturies”.

Finalmente, tamién dende l’ámbitu universitariu remarquen que, “en primer llugar, l’asturianu ha ser una asignatura pa tolos alumnos, una asignatura normal, non una optativa, nin voluntaria, non enfrentada a otres materies”. Y en segundu llugar, “que ye necesario que se dean pasos pa que l’asturianu se convierta nel idioma vehicular d’otres asignatures, buscando un modelu afayadizu p’Asturies que permita que l’asturianu seya llingua d’usu habitual nes aules, amás de poder ufiertase como oxetu d’estudiu particular ya individualizáu na universidá mediante les preceptives ferramientes académiques”. Pa ello, recuerden, “ye bien importante la reconocencia de la especialidá del profesoráu d’asturianu, agora que los estudios tán homologaos dafechu nel marcu européu”.

El CUPA pidió al Rector un posicionamientu claru de la Universidá d’Uviéu, recordándo-y al traviés d’una carta los sos compromisos adquiríos dientro del Alcuerdu Programáticu pa la Política Llingüística (2012-2016) firmáu pol Rector Vicente Gotor na última campaña, nel que se comprometía “a facer llegar al Gobiernu d’España la reclamación de la reconocencia de la especialidá”. El CUPA ta acabante solicita-y que cumpla con esti puntu “agora que ye más necesario que nunca defender la situación de los profesores d’asturianu formaos na Universidá d’Uviéu”.