Australian Blonde edita’l so séptimu discu, plenu de matices y cuidáu nel soníu

Australian Blonde llega al séptimu. La banda xixonesa saca al mercáu el so discu númberu siete, ‘Canciones de amor y gratitud’, un trabayu plenu de matices, continuista respecto al pop rock de cedés anteriores y mui cuidáu na producción, que se prollongó a lo llargo de los dos últimos años a cargu’l guitarrista Paco Loco.

Depués d’afitar un soníu propiu nos dos trabayos anteriores (‘Momento’ y ‘Lay it on time’), Australian Blonde pon agora nes estanteríes de les tiendes de discos un productu que los propios miembros de la banda reconocen como la meyor grabación d’estudiu de la so carrera. “Sé que ye lo que siempre se diz nes entrevistes, pero piénsolo honradamente”, señala’l vocalista del grupu, Fran Fernández.

Nuna nota difundida pola casa discográfica Astro, qu’edita ‘Canciones de amor y gratitud’, los músicos xixoneses prometen un pop “preciosista llenu de matices que va presta-yos a quienes disfruten con Brian Wilson, Lambchop, Lloyd Cole, Wilco o Jayhawks”.

El sellu asoleya’l sétimu discu d’Australian Blonde en dos formatos estremaos: en digipack, con cuatro temes adicionales, llibretu coles lletres y un recopilatoriu de regalu pa los clientes de ciertos establecimientos musicales; y na versión de bolsiellu, con menos elementos extra pero tamién con un preciu menor.

Formada en Xixón hai agora diez años, la banda Australian Blonde ta considerada como una de les creadores, xunta Penélope Trip, del movimientu musical definíu como ‘Xixón Sound’.