Portada Educación Asturies ye de les que menos dineru recibe d’ayudes p’alumnos vulnerables

Asturies ye de les que menos dineru recibe d’ayudes p’alumnos vulnerables

by redacción asturnews
Foto: srgpicker (https://www.flickr.com/photos/srgblog/)

El Principáu va recibir 1.549.524 euros del programa PROA+, que pretende afaese a la situación educativa del próximu cursu 2020-2021 y asina, Asturies asítiase como una de les comunidaes que menos dineru recibe de la repartida d’ayudes pa los alumnos más vulnerables.

Asturies, con 1,55 millones d’euros, ye una de les comunidaes autónomes que menos dineru recibe del programa de refuerzu educativu PROA+ pa restablecer y reforzar el funcionamientu de los centros educativos el próximu cursu.

El Boletín Oficial del Estáu (BOE) publicó esti xueves pasáu’l resolvimientu de 31 de xunetu de la Secretaría d’Estáu d’Educación, pola que se publicaba l’alcuerdu del Conseyu de Ministros de 21 de xunetu que formaliza los criterios de distribución a les comunidaes autónomes, aprobaos pola Conferencia Sectorial d’Educación, según la distribución resultante del creitu destináu anguaño al Programa de cooperación territorial pa la orientación, meyora y arriquecimientu educativu na situación d’emerxencia educativa del cursu 2020-21 provocada pola pandemia del COVID-19: PROA+ (20-21).

Según esta repartida, yá conocía, Asturies va recibir 1.549.524 euros del programa PROA+ que pretende afaese a la situación educativa del próximu cursu 2020-2021, provocada pola suspensión temporal de l’actividá lectiva presencial dende marzu hasta’l final del cursu y l’impactu negativu del confinamientu nel bienestar y nel progresu del alumnáu.

Menos qu’Asturies va recibir Cantabria, con 1,47 millones. Dempués figura La Rioxa (1,57), ientras que les más beneficiaes son Andalucía (5,34 millones), Cataluña (4,51) y Madrid (3,76 millones). El criteriu de repartida ente les comunidaes realizóse teniendo en cuenta’l númberu d’alumnos escolarizaos n’Educación Primaria y Secundaria Obligatoria (50%); el porcentaxe d’alumnos con necesidaes específiques de sofitu educativu (20%); la tasa de idoneidad a los 15 años (20%) y la dispersión de la población, en base al Censu de Población y Vivienda 2011 del Institutu Nacional d’Estadística (10%).

Esti plan tien como oxetivos garantizar la continuidá y la meyora educativa del alumnáu nel cursu 2020-2021, con especial atención a los y les más vulnerables; y restablecer, reforzar y ameyorar el funcionamientu de los centros educativos nes condiciones especiales pal próximu cursu, flexibilizando la so organización, garantizando les condiciones escolares encamentaes poles autoridaes sanitaries.

 

Tamién te podria gustar