Asturies súmase al Atles Llingüísticu de la Península Ibérica

La Conseyería de Cultura y Turismu, pente medies de la Direición Xeneral de Política Llingüística, sumóse al proyeutu intramural “Ellaboración y edición de los materiales del Atles Llingüísticu de la Península Ibérica (ALPI)”, coordináu pol Conseyu Superior d’Investigaciones Científiques. Pa ello, va convocar en 2010 la beca d’investigación “Lorenzo Rodríguez Castellano” pal tratamientu y estudiu de los materiales asturianos.

L’ALPI ye’l gran atles de les llingües romances peninsulares, una obra d’estraordinaria importancia precisamente porque faltaba pa la Península Ibérica l’atles xeneral que munchos dominios llingüísticos europeos tienen y que permitiría l’estudiu comparáu de toles fales iberorromániques. Esta obra, concebida pol equipu de Menéndez Pidal y dirixida por Tomás Navarro Tomás, ye tamién un documentu de gran valor científicu pa conocer l’estáu de les fales peninsulares ente 1930 y 1936, años nos que se fixeron la mayor parte de les encuestes que la componen.

El filólogu asturianu Lorenzo Rodríguez-Castellano, impulsor de la llectura pública n’Asturies al que la Conseyería dedicó’l Día del Llibru nel añu 2009, foi tamién el responsable de la parte asturiana del ALPI; poro, y col preste de la so familia, Lorenzo Rodríguez-Castellano va dar nome a les beques d’investigación que dende 2010 va convocar el Gobiernu asturianu como aportación a la edición d’esta gran obra. La primer beca predoctoral, con una dotación de 15.000 euros, ta empobinada a llicenciaos en Filoloxía y con destín na sede madrilana del CSIC. Alcuéntrase yá en tramitación.

L’equipu científicu del proyeutu, coordináu pola Profesora del Conseyu Superior d’Investigaciones Científiques (CSIC), Pilar García Moutón, integra a investigadores de los distintos dominios peninsulares. El Caderalgu de Filoloxía de la Universidá d’Uviéu José Antonio Martínez ye la referencia asturiana d’esti proyeutu.