Asturies prende perdayuri na nueche de San Xuan

La mayor parte de los pueblos y ciudaes d’Asturies van prender güei martes, al llegar la nueche, fogueres de tolos tamaños, destacando les folixes preparaes en Xixón, Corvera, Avilés y Noreña, d’ente les munches celebraciones previstes pa la nueche más curtia del añu. Uviéu recupera la folixa tradicional que se fuere perdiendo nos últimos años na capital.

La playa xixonesa de Pando, n’El Fomento, va acoyer como cada añu una de les fogueres más grande d’Asturies, qu’esti añu va cuntar colos sones del cuartetu de folk asturianu Blima, amás de con una sesión pirotécnica y cola participación de l’asociación folclórica Los Sustos, que va interpretar l’espectáculu tituláu “Nel Arcu Atlánticu”. Dempués de la foguera, la música va tar al cargu de delles orquestes asturianes.

N’Avilés, el gaiteru escocés Fred Morrison va abrir la folixa a les 23:00 hores na plaza de Pedro Menéndez, frente al Parque’l Muelle. A les doce va prendese la foguera y baillaráse la danza prima. Morrison volverá a xubise al escenariu a la una y media pa siguir poniendo música a una nueche que prometen va ser “de prodixos, espíritus y maxa”.

Corvera, pela so parte, va celebrar la so tradicional y esitosa foguera de San Xuan nel Palaciu de Tresona, xunto al banzáu, Na mesma van abrir la xornada a les 19:30 y pa los más pequeños, la formación Amafolk, pa depués siguir colos malabares d’El Ñeru los Coríos y les performances de Los Pyroduendes. La foguera va prendese a les 24:00 hores cuntando darréu, cola actuación del dúu británicu Shona Kipling & Damien O’Kane y Dixebra.

Nel conceyu más pequeñu d’Asturies, Noreña, l’asociación folclórico-musical Villa y Condáu de Noreña, en collaboración cola Conceyalía de Cultura, tien preparada una riestra d’actos pa festexar la Nueche de San Xuan. El Parque los Riegos, va recibir un pasacais con pareyes de gaiteros y cabezudos, xuegos tradicionales pa neños y partíes de tiru al palu, llanzamientu de barra, liriu, carrera de panoyes y llecheres o pasabolu, ente otros. A les 20:00 hores ta previstu’l Festival de Canción Asturiana, colos alumnos de la escuela de música tradicional de Noreña. La formación Ensame Folk va ufiertar un conciertu a partir de les 22:00 hores. Dempués de la foguera va haber una traca pirotécnica.

Na capital d’Asturies, y dempués de nun celebrar nengún actu en 2007 y d’una probe foguera en 2008, la Sociedá Uviedina de Festexos organiza una folixa con foguera, banda de gaites y espectáculu con pasacais a cargu del grupu de teatru Margen. A les 21.00 hores van llegar los grupos folclóricos Trasgu, La Inmaculada y los Coros y Dances Ciudá d’Uviéu.