Asturies espón una esbilla de los sos productos gastronómicos del país nes sales VIP de Barajas

El Principáu d’Asturies espón dende güei, en collaboración cola compañía Iberia, una selección de los productos gastronómicos más representativos de la rexón nes sales VIP de la Terminal 4 del Aeropuertu de Barajas. Gracies a esta iniciativa, que se presenta baxo’l nome ‘“Saboreando Asturias, Rutas de los Alimentos del Paraíso”, los viaxeros puen prebar delles delicies típiques asturianes.

Tres percorrer la sala y visitar la esposición, hai una preba culinaria de diferentes productos como’l vinu de la Tierra de Cangas, la sidra y los quesos d’Afuega´l Pitu y Cabrales, que valen de menú degustación pa tolos pasaxeros que pasen pela zona VIP de la T4, que según datos de AENA, son alredor de 3.000 cada día. Esti fechu constitúi una oportunidá grande pa promocionar Asturies como destín turísticu, asina como la so gastronomía, tanto a nivel nacional como internacional.

La inauguración de la muestra cuntó cola presencia del Delegáu del Gobiernu del Principáu d’Asturies en Madrid, Miguel Munárriz Cellino, la Directora Xeneral de Turismu, Elisa Llaneza Álvarez, el Director Xeneral de Ganadería y Agroalimentación, Enrique Rodríguez Nuño, el Xerente de la Sociedá Rexonal de Turismu, Jesús Alfaro García, y dellos directivos d’Iberia. La nueva esposición va prollongase hasta’l 21 d’avientu próximu nel aeropuertu madrilanu.

La esposición recueye la esencia de les 4 primeres “Rutas de los Alimentos del Paraíso”, una orixinal iniciativa qu’introduz el cine pa destacar los productos asturianos más reconocíos dando como resultáu cuatro títulos de corte cinematográficu: “El Código Afuega’l Pitu”; “Los Señores del Vino de la Tierra de Cangas”, “Desayuno con Cabrales” o “Hasta que Llegó su Sidra”.

El Principáu d’Asturies repite esperiencia con esta nueva esposición, que yá pasó en marzu pel Aeropuertu de Barajas, y que tuvo tamién presente, hasta la selmana pasada, nel Aeropuertu del Prat de Barcelona. En total, unes 67.000 persones disfrutaron yá d’esta acción promocional.