Asturies escueye representante pal Liet-Lavlut 2009 esti sábadu

La televisión pública asturiana va emitir esti sábadu, 21 de febreru la Gala d’Entrega de la III edición del Premiu al Meyor Cantar en Llingua Asturiana, que va celebrase na Casa Cultura de Mieres, a partir de les siete la tarde. L’actu, van presentalu Vanesa Gutiérrez y Naciu Varillas y va cuntar cola participación de los cinco finalistes: Alfredo González, Bacotexo, Musicos pola Oficialidá, La Bandina y Felpeyu, d’ente los que va salir el representante d’Asturies nel festival Liet-Lavlut, que va celebrase esti añu en Frisia, nos Países Baxos.

Nel trescursu de la gala va dase a conocer el cantar escoyíu tres de les deliberaciones d’un xuráu independiente, especializáu y formáu a esti efectu.

El Premiu al Meyor Cantar en Llingua Asturiana quier reconocer el trabayu de los creadores musicales qu’escueyen les llingües tradicionales d’Asturies como ferramienta de comunicación, buscando’l dar puxu a les composiciones orixinales (en lletra y música) feches n’asturianu o en gallego-asturianu. Nesta III edición los artistes y cantares finalistes son Alfredo González, con “La nada y tu” (de La nada y tu, Discos L’Aguañaz); Bacotexo, con “Queimar el cielo” (d’A máquina del tempo, Boomerang Records); La Bandina, con “Valse coxu” (de 13, Discos L’Aguañaz); Felpeyu, con “Refalfiu” (de Canteros, Tierra Discos); y Músicos pola Oficialidá, con “Garra la palabra” (de Garra la palabra, Xunta Pola Defensa de la Llingua Asturiana).

L’artista ganador va recibir una pieza escultórica de l’artista María Xesús Rodríguez.

La Gala d’Entrega de la III edición del Premiu al Meyor Cantar en Llingua Asturiana, va zarrase cola actuación d’Herbamora, conxuntu de pandereteres que ganó na edición del 2008.