Andecha Astur lleva al xulgáu lo que considera “l’espoliu etnográficu de San Andrés”

Andecha Astur ta acabante anunciar que va presentar una demanda pol “espoliu etnográficu ocurríu en San Andrés de los Tacones” nel que según Andecha “súmase la vulneración de la Llei de Patrimoniu cola conivencia de les alministraciones llocal y autonómica”, que fai qu’AA tenga’l convencimientu plenu de que “nin l’Ayuntamientu Xixón nin la Conseyería Cultura van depurar les pertinentes responsabilidaes nestos fechos, darréu que dambos formen parte de la sociedá ZALIA S.A., colo que son xuez y parte nos fechos”.

La formación independentista pide pal Ayuntamientu y el Gobiernu d’Asturies, a los que considera cómplices, “una sanción exemplar en función de la gravedá de los fechos y l’alarma social xenerada”.

Pa ello, AA decidió interponer la correspondiente denuncia nel xulgáu al oxetu de que seya’l poder xudicial “el que sancione a los que son, precisamente, los encargaos de velar pol nuesu patrimoniu etnográficu”.

Na denuncia presentada, Andecha Astur resalta’l fechu de que pesia que los vecinos yá denunciaren la esapaición d’horros y paneres énte la Conseyería Cultura en xunu del 2008, “tanto’l «Principado» comu l’Ayuntamient Xixón guardaren un silenciu cómpliz fasta que la presión social los punxere n’evidencia, y entá asina, pretendieren eludir les sos responsabilidaes, culpabilizando a particulares y a la sociedá ZALIA S.A.”.

Per otru llau, Andecha Astur considera perinteresante la iniciativa presentada por «El Garrapiellu» nel sen d’aniciar una plataforma en defensa de los bienes culturales y ambientales d’Asturies, anunciando la so “disposición” a collaborar cola mesma.