Andecha Astur celebra sos 25 años pidiendo soberanía y oficialidá

La cellebración del 25 Aniversariu d’Andecha Astur supunxo una ufierta de collaboración col restu del soberanismu asturianu y la petición de soberanía, socialismu, oficialidá ya igualdá.

L’actu, cellebráu esti sábadu 28 de payares, entamó cola llectura del poema d’Andrés Solar, “Prúyemos un Pueblu Llibre” a cargu d’un grupu de neños que desfilaron hasta l´escenariu cola bandera d´Asturies. La llectura dio pasu a Marcos A. Fernandi, que n’agradeciendo la presencia a los asistentes, ampliada a tolos que nun pudieren asistir y a toos aquellos que, nun momentu o n’otru, tovieren trabayando n’Andecha Astur, rizo una llectura política del testu d’Andrés Solar.

Llucía Fernández pasó darréu a la llectura de comunicaos  de saludu y sofitu de dellos compañeros que nun pudieron tar presentes, comu David Rivas o Antón Fuertes; y d’organizaciones internacionales ANC, CUP, CHA, BNG. L´actu contó cola  intervención de Jon Iñarritu (Diputáu d’Amaiur/ EH-Bildu) a quien se-y debe la tramitación en Madrid de múltiples entrugues y propuestes d’Andecha Astur nel Parllamentu español, que tuvo pallabres de sofitu y ánimu pa los presentes.

Nel actu, Marcos A. Fernandi reivindicó’l papel d’Andecha Astur na asunción pola sociedá asturiana de “munchos plantegamientos nacionales, sociales y puramente democráticos, dende la  Oficialidá, la denuncia de la  emigración forciada de la mocedá asturiana, la denuncia del papel de les direiciones sindicales arriqueciéndose a costa de presllar les mines, la denuncia de la galleguización del ocidente asturianu, la refuga del monocultivu d´ocalitos , la mafia y les redes clientelares del PSOE, los Fondos Mineros, el Niemeyer, etc.  pasando dempués a enumberar dellos de los grandes ésitos d’Andecha Astur  nestos 25 años, comu´l  trunfu énte’l Tribunal  Costitucional español qu´obliga a almitir l´usu del asturianu nes elleiciones, pasando pola denuncia de la seguridá nel Pozu Nicolasa, la paralización del PGOU de Llanes, el de Xixón, o más recientemente la denuncia ente la OLAF del Fraude d’El Musel, pasando per otros trunfos a nivel de Conceyu”.

Na intervención de Marcos A. Fernandi nun faltó la reconocencia d’erros, d’equívocos y  perriba de too, la falta de rentabilización política de la capacidá d’incidencia social, al tiempo que destacaba’l “llabor de los medios de comunicación “asturianos” por tapecer y criminalizar sistemáticamente  l´actividá política d´Andecha Astur, l’apaición y esaniciu continuo d’organizaciones nacionaliegues qu’ufríen  soluciones máxiques y resultaos elleutorales millagrosos que s’esaniciaben tres quedar n’evidencia la so falsedá, dexando un ermu de desenfotu ente los que los creyeron y de tracamundiu ente la sociedá asturiana”.

Nel mesmu sen, denuncióse la imposibilidá d’aportar a alcuerdos “con organizaciones que, reivindicándose nacionaliegues, nunca tuvieron altura de mires  pa facer un frente común con Andecha, pero tampocu tuvieron reparos  n’integrase en  formaciones polítiques españoles, namás a cambiu d’unos  puestos”. A la escontra, valoróse comu un aciertu la participación en la coalición  Los Pueblos Deciden p´asegurar una presencia digna d´Asturies  nel parllamentu européu, destacando que gracies al eurodiputáu, Josu Juaristi,  Andecha Astur tien llevao la problemática asturiana a Europa más y meyor que’l conxuntu de los eurodiputaos asturianos integraos en los partíos españoles.