Ana Caro sustitúi a Lorenzo Almanza como xerente de la Universidá

El Conseyu Social de la Universidá d’Uviéu que se celebraba la selmana pasada traxo la sorpresa del arrenunciu de Lorenzo Almanza Ballesteros a siguir como xerente de la institución académica, dieciséis meses dempués de designalo pal puestu.

Según esplicó nun comunicáu oficial espublizáu hores dempués la Universidá, la dimisión respuende a razones «puramente personales». Tres elles, según pudo saber esti periódicu, taría la negativa del Principáu d’Asturies -alministración a la que pertenez como funcionariu de carrera- a concede-y los servicios especiales, figura contemplada na llei p’aquellos emplegaos públicos que son designaos pa ocupar cargos n’organismos públicos, órganos de gobiernu de comunidaes autónomes, el Tribunal de Cuentes o’l Constitucional, ente otros munchos supuestos. La situación de servicios especiales puede caltenese de forma indefinida y, una vegada rematada, el funcionariu tien derechu a volver al so puestu nes condiciones y coles retribuciones correspondientes a la so categoría.

Mientres la intervención del propiu Almanza na xunta del Conseyu Social, el inda xerente de la Universidá estimó «el sofitu, l’enfotu y el respaldu» del Rectoráu mientres los dieciséis meses que permaneció nel cargu.

La so sucesora va ser Ana Caro Muñoz (Burgos, 1972), actual coordinadora de proyectos de la Universidá Autónoma de Madrid. Va Ser el próximu miércoles, nuna xunta estraordinaria del Conseyu Social de la Universidá d’Uviéu que va empezar les 8.30 hores, cuando esti órganu informe favorablemente de la dimisión de Lorenzo Almanza y Santiago García Granda proponga a la nueva xerente.

Ana Caro Muñoz ye llicenciada en Derechu pola Universidá de Burgos, diplomada pol Conseyu Xeneral de l’Abogacía Española en Práctica Xurídica y diplomada n’Estudios Avanzaos pola realización y defensa del trabayu d’investigación tituláu Laboralización y conflictividá: los derechos de autotutela del personal docente ya investigador (PDI) contratáu.

Lorenzo Almanza Ballesteros (Llión, 1958), llicenciáu en Derechu pola Universidá d’Uviéu y funcionariu técnicu d’Alministración, fuera designáu en mayu de 2016 como xerente de la institución académica tres la llegada de Santiago García Granda al Rectoráu. Sustituyó nel cargu a Marta González Prieto.