‘Al Aldu’ pasa a emitise a les 10:30 de la mañana na TPA

L’únicu programa diariu de la Televisión del Principáu d’Asturies, Al Aldu, cambió d’horariu esta selmana y pasó a emitise a les 10:30 de la mañana de llunes a vienres. Al Aldu va siguir colos sos espacios habituales presentaos por Lluis Antón González, Carlos Suari, Milio’l del Nido, Inaciu Galán y Mercedes Menéndez y con una duración d’unos quince minutos diarios.

Los llunes ye’l momentu pal humor y ‘Al aldu’ dedica’l so tiempu a ‘La risión’, una sección coordinada por Lluis Antón González y onde apaecen dalgunos de los meyores monologuistes modernos del país. Los martes Carlos Suari ta al frente de la sección deportiva ‘A galmiaes’, que percorre l’actualidá deportiva d’Asturies. Milio’l del Nido lleva a los espectadores les sos ‘Recetes con cuentu’ los miércoles, mientres que los xueves ye Inaciu Galán l’encargáu d’acercanos l’actualidá internacional más entretenida con ‘Xente de casa’. ‘Al aldu’ termina la so selmana los vienres con Mercedes Menéndez y la so ‘Axenda d’Asturies’, con actividaes pa la fin de selmana.

Pa los que nun pueden velos pela selmana, el programa repítese los sábados a les 10:30 y a les 12 de la mañana. El programa produzlo ‘Saltadera’, la productora dirixida por Antón García.