Afayen una ventena de tumbes visigodes en Palencia

La unidá d’arqueoloxía de la IE University afayó siquier una ventena de tumbes visigodes de finales del sieglu VI y principios del VII demientres los trabayos arqueolóxicos que realiza na localidá palentina d’Herrera de Pisuerga, previos a les obres p’ampliar el trazáu d’una cai.

Hasta’l momentu, los arqueólogos d’esa universidá, dirixíos pol doctor Cesáreo Pérez González, toparon siquier una ventena de tumbes que, según tolos nicios, formaríen parte d’una zona entá desconocida de la necrópolis visigoda de la ciudá d’Herrera de Pisuerga, ensin dulda, unu de los campusantos visigodos más importantes de la Península Ibérica y meyor documentaos del norte d’España.

Según detalló la IE University al traviés d’un comunicáu, tratase d’unes obres promovidas y executaes pol Conceyu d’Herrera de Pisuerga y l’Unidá d’Arqueoloxía d’esti centru universitariu, que cunten cola collaboración del Institutu d’Estudios Pisoraca, pa cumplir cola llei de Patrimoniu en Castiella y Llión.

Los arqueólogos señalen que dalgunes de les cadarmes, afayaes en caxes funeraries de madera, atópense en bon estáu,  ente qu’otros restos óseos vos recuperaos amuesen un peor caltenimientu. Dalgunes d’estes tumbes, siquier trés d’elles, contienen importantes dotes funeraries, lo que, según Pablo Apuertes, miembru de la Unidá d’Arqueoloxía, “revela la importancia del afayu y acota l’usu de dichu espaciu urbanu como campusantu”.

Los enterramientos topaos agora completaríen los descubiertos a principios del sieglu XX (1930-1931) na necrópolis visigoda d’Herrera de Pisuerga, que yá foi documentada nos años trenta pol arqueólogu español Julio Martínez Santa-Eulalia.