La Orquesta Sinfónica d’Avilés ufre’l Conciertu d’Añu Nuevu nel Palacio Valdés

La música clásica volverá dar la bienvenida al 2023 n’Avilés, nun Conciertu d’Añu Nuevu institucionalizáu yá como tradición navidiega, cada 1 de xineru nel Teatru Palacio Valdés. Ufiertáu pola Orquesta Sinfónica Ciudá d’Avilés, a les 19.00 hores.

Entamáu pola conceyalía de Cultura y Promoción de Ciudá d’Avilés, y la collaboración inestimable del Conservatorio Municipal Profesional Julián Orbón y de la Sociedá Filarmónica Avilesina, foi presentáu esta selmana pasada pola conceyala de l’Área, Yolanda Alonso, acompañáu pol director de la Orquesta, Iván Cuervu, y del presidente de la Sociedá Filarmónica Avilesina, Marín Soria.

Les entraes pa poder asistir como públicu punxéronse a la vienta esti martes, día 20, con precios de 10, 12 y 15 euros, en función del allugamientu nel teatru, nes canales habituales, la web https://uniticket.janto.es/palaciovaldes/public/janto/main.php y la taquilla de la Casa de Cultura.

Algama la so quinta edición, al nun podese entamar en 2021 por causa de les restricciones pola pandemia, y retomáu pa celebrar el 2022, como resaltó Alonso, “tratar d’unu d’esos momentos especiales, que nos dexa empezar un nuevu añu de la meyor forma, con cultura, fecha dende Avilés, una ciudá na que la música forma parte del nuesu ADN, y cola fundamental aportación del Conservatorio y l’agradecimientu a tolos y les profesionales que componen la orquesta pol so compromisu y dedicación”.

Per segundu añu, la mezzosoprano Marina Pardo, profesora del Conservatorio Julián Orbón, va poner voz a varies de les obres que se van interpretar, en concretu a la “Weihnachtsgefülh” de Richard Strauss, y a un clásicu de la música popular contemporanea, el “In the Still of de night” de Cole Porter. Coles mesmes, Isidoro Oteru va exercer la so maestría como clarinete solista nes “Czardas”, de Vittorio Monti.

La Orquesta Sinfónica d’Avilés, integrada n’esclusiva pa la realización del conciertu y so la batuta d’Iván Cuervu, va tar conformada por 38 intérpretes profesionales d’Asturies, profesores del conservatorio Julián Orbón y antiguos alumnos del centru educativu que formen parte d’orquestes de gran reputación tantu nacionales como internacionales.

Van componer la sección de cuerda cinco violinos primeros, cuatro violinos segundos, cuatro violes, trés violonchelos y trés contrabaxos; la de vientu, dos oboes, dos flautes, dos clarinetes, dos fagotes, trés trompes, trés trombones y dos trompetes, y van completar l’elencu, na sección de percusión, trés percusionistas.

Más información