Portada Educación Educación ufierta 13.000 places de formación al profesoráu

Educación ufierta 13.000 places de formación al profesoráu

by redacción asturnews

La Conseyería d’Educación ufierta de setiembre a mayu más de 13.000 places de formación del profesoráu distribuyíes nun total de 212 actividaes centraes na dixitalización, la innovación educativa y les nueves metodoloxíes. La pandemia y les actuales circuntancias obligaron a afaer el plan formativu pa docentes y averalu a nueves formes d’impartición.

Ello ye que ente los cursos más demandaos tán los de Office 365, Mooddle, Podcast y Teams y yá s’entamaron delles convocatories. El plan sigue col trabayu realizáu nel últimu trimestre del cursu pasáu, nel que se reorganizó la ufierta pa dotar al profesoráu de ferramientes que-yos dexara siguir col so llabor mientres el confinamientu. Entós, programáronse 42 webinar nos que participaron 7.000 docentes y llanzáronse 3.000 places de formación p’acompañar la tutorización dixital.

La directora d’Ordenación, Evaluación y Equidad Educativa, Paula García, esplicó que, amás de les temátiques, afixéronse los formatos y la manera na que s’entama la formación. «Les convocatories online de seminarios, talleres y grupos de trabayu o los webinar vinieron pa quedase. Esto déxanos desenvolver una ufierta que llega a la totalidá del profesoráu. Esto ye, que s’amonta la participación cola mesma o mayor calidá que nes acciones presenciales», añedió.

Los cuatro centros del Profesoráu y de Recursos (CPR) entamaron a lo llargo del cursu tou tipu d’actividaes pa facilitar la participación. Na programación pueden atopase dende cursos a seminarios, proyectos formativos en centros, grupos de trabayu y unidaes formatives. Tán volviéndose a programar talleres con una elevada demanda, na que la cifra de comenenciudos ye cimeru al númberu de places.

L’atención al alumnáu más vulnerable ye otra prioridá, al igual que’l desenvolvimientu de redolaes dixitales dientro de los centros. Amás de la integración de la tecnoloxía nel ámbitu educativu y les metodoloxíes curiáronse otres temátiques fundamentales como la formación pa la inclusión y la equidad o la educación ambiental y la sostenibilidá. Nel tercer trimestre, van desenvolvese actividaes venceyaes a les metodoloxíes y procedimientos pa la evaluación del aprendizaxe.

Tamién te podria gustar