La Universidá d’Uviéu va impulsar la responsabilidá social corporativa

La Universidá d’Uviéu y l’Asociación Española de Directivos de Responsabilidá Social (DIRSE) roblaron un conveniu de collaboración pa llevar a cabo actividaes rellacionaes cola investigación, el desenvolvimientu, la innovación y la formación nel campu de la responsabilidá social corporativa.

L’alcuerdu, que tien una vixencia inicial de cuatro años, foi suscritu de manera telemática ente’l rector de la institución académica, Santiago García, y la presidenta de DIRSE, Elena Valderrábano. Unu de los oxetivos ye incluyir la visión y l’esperiencia profesional de la responsabilidá social corporativa nos estudios académicos d’esti campu por aciu l’aportación de profesoráu, el diseñu de cursos, práctiques y seminarios y la promoción d’investigaciones y publicaciones.

Según informaron dambes instituciones, esti marcu de trabayu va dexar estender y fomentar el rol de la responsabilidá social corporativa n’Asturies ya impulsar l’exerciciu d’esta función nel texíu empresarial.

Pal rector esti conveniu ye’l reflexu del interés de la Universidá d’Uviéu «por investigar y actuar con responsabilidá social na so xestión» y demuestra el so apueste por reforzar les relaciones coles empreses «p’arriquecer la formación y fomentar la empleabilidá del nuesu estudiantáu