11 mozos d’Avilés participen nun intercambiu xuvenil n’Alemaña

Esti vienres 23 de xunu, 11 mozos provenientes del Conseyu d’Infancia y Adolescencia d’Avilés y del proyectu de Conecta Mozu viaxaron a Wiesbaden (Alemaña) pa participar nel intercambiu xuvenil internacional “Snapshot”. El mesmu llevaráse a cabu hasta’l 2 de xunetu.

El proyectu ta impulsáu pola organización alemana Arcu, en collaboración col Serviciu de Mocedá del Conceyu d’Avilés al traviés de la so Oficina de Movilidá Xuvenil Internacional “Europa Equí”, y enmárcase dientro de les acciones del programa comuñal “Erasmus+: Mocedá n’Acción”.

Col sofitu d’un grupu de seis monitores nel que participen dos técniques de mocedá del Conceyu d’Avilés, el grupu de 30 mozos provenientes d’España, Alemaña y Francia van desenvolver mientres el proyectu actividaes de convivencia intercultural, arte y creatividá amás d’escursiones pa conocer Wiesbaden y contorna y talleres de teatru y  video.