Educación valora camudar el cursu de práctiques tres les quexes de los docentes

La Conseyería d’Educación va estudiar cómo llevar a cabo cambio nos cursos de formación pal personal docente en práctiques tres les quexes espresaes pol profesoráu que tien que movese dende les nales a la zona centro para cumplir con esti requisitu, obligatoriu para tolos qu’aprobaron les oposiciones.

Unos 700 profesores, provenientes de toa Asturies, asistieron esta selmana pasada en La Llaboral, en Xixón, a la primer xornada de los ocho que completen esti programa formativu. «Dalgunos tienen que venir dende A Veiga o Cabrales y pidir pa ello hores llibres. Eso ye una gran molestia pa los docentes que se mueven como pa los centros nos que trabayen», indicó Tinu Brugos, del sindicatu Suatea. «Aprendiendo de la situación actual, vamos ver de qué manera se puede flexibilizar teniendo en cuenta que les práctiques son obligatories», aseguró la conseyera del ramu, Carmen Suárez.

«Lo importante sería que s’estendieren les sedes del cursu nel territoriu pa evitar los desplazamientos y embrivir les incomodidaes», dixo Brugos. Dende Suatea tamién se plantega que «la formación a distancia como yá se fai n’otres comunidaes autónomes».

Los representantes del sindicatu treslladaron delles propuestes a la conseyera a la so llegada a la Llaboral. Nesti sentíu, Carmen Suárez destacó que nestos momentos «hai una llei que la prescribe», anterior a la so llegada a la Conseyería d’Educación. «Tamién ye verdá que dientro de la nuesa autonomía podríamos tratar de ordenar d’otra manera p’averar más la formación a los centros de trabayu o, nel so casu, establecer una midida alternativa». Enagora, la conseyera amosóse abierta a estudiar «toles posibilidaes de cambéu del procedimientu».