“Mio ma, la pirata” preséntase esti xueves en Xixón

La escritora Iris Díaz Trancho presenta güei, xueves 10 de xunu, el so llibru últimu “Mio ma, la pirata” col que Suburbia Ediciones inagura la so colección de lliteratura infantil. La obra ta ilustrada por Gloria Caamaño. La presentación va celebrase a les 19.30 nel Institutu Vieyu Xovellanos de Xixón con Xulio Berros como “maestru de ceremonies”.

Como’l títulu indica “Mio ma, la pirata”, ye una hestoria de pirates anque atípica: Barba Negra lleva un restaurante y Barba Roxa ye xastre. La ma del nenu protagonista sigue surcando los mares buscando barcos que prindar y ayalgues escondíes. Con ayuda de la perra Pulga entamen un viaxe a Madagascar en busca del mayor tesoru de toos.