“La ciencia n’otres palabres” ufre ensayos ciéntificos n’asturianu

Ediciones Trabe ta acabante d’asoleyar “La ciencia n’otres palabres”, un llibru d’ensayu n’asturianu coordináu por Xulio Viejo, profesor de la Universidá d’Uviéu. Ente los testos atopamos “Xenómica: desenduvellando’l filangrayu de la vida” de Xosé María Fernández; “El llinguaxe: ente la vida, el conocimientu, la creatividá y la ética” de Xulio Viejo Fernández; “Xenética y adomamientu” de Félix Goyache; “La ecoloxía microbiana marina como exemplu de cambiu de paradigma científicu” de Xosé Ánxelu Gutiérrez Morán; “Distribución de la deformación nes roques plegaes y problemes que plantega” de Noel Canto Toimil; “Cáncer: historia y perspectives” de Xosé Antón Suárez Puente; “Les tecnoloxíes de la informática y les telecomunicaciones” de Xabiel García Pañeda y David Melendi Palacio y “Discursu, realidá y ciencies sociales”, de Pablo San Martín Antuña. Toa una amuesa de les posibilidaes infinites del idioma asturianu pa desendolcase en cualesquier tema.