Portada Fiestes ‘Felpeyu’ denuncia l’actitú de los organizadores del conciertu de San Xuan, tres el que morrieron Ígor Medio y Carlos Redondo

‘Felpeyu’ denuncia l’actitú de los organizadores del conciertu de San Xuan, tres el que morrieron Ígor Medio y Carlos Redondo

by asturnet

Redacción.

El grupu Felpeyu, qu’apocayá volvió a los escenarios dempues de la perda de dos de los sos miembros en xunu del añu pasáu, denunció “l’actitú del conceyal corverán Luis Solares”, anguaño candidatu a l’alcaldía del conceyu. Na nota de prensa que remitieron, “Felpeyu quier denunciar el funcionamientu internu desastrosu del Ayuntamientu de Corvera, en particular na so estaya musical, personalizándolo nel señor Conceyal de Cultura Luis Solares”.

Nel comunicáu, el grupu denuncia “una actitú que contrasta, por exemplu, cola del Festival de Músiques d’Arrel de Calaf (Barcelona), onde Felpeyu tenía que tocar al día siguiente de la horrible nueche del 23 de xunu. Evidentemente, el conciertu nun pudo celebrase, pero la organización del mesmu abonó igualmente’l cache del grupu, amás d’interesase vívamente pol estáu de los felpeyos y les sos families”.

Felpeyu diz facer públicu esti casu como denuncia d’un “comportamientu lloñe del que se tien que tener con persones que tán trabayando, amás dexar polos suelos la imaxe del conceyu de Corvera que nun merez dirixentes d’esti tipu”. El xueves a les 12 del meudía, nel llar social de la Sociedá Xeneral d’Autores n’Uvieu van celebrar una rueda de prensa pa esplicar esti comunicáu.

Tamién te podria gustar