Sociedá Izquierda Xunida-BA volvió pidir na Xunta Xeneral la supresión del peaxe n’autovía del Güerna by asturnet 12 de xunu, 2005 El grupu parlamentariu d’Izquierda Xunida-Bloque por Asturies, per mano del so diputáu Aurelio Martín, presentó esti viernes 10 na Xunta Xeneral una nueva iniciativa pa consiguir la supresión del peaxe n’autovía del Güerna. La coalición encamienta-y al Conseyu de Gobiernu del Principáu que pida al executivu central una respuesta nel plazu másimu de tres meses na que se detalle la fórmula p’acabar col pagu na utilización de la principal vía de salida y entrada d’Asturies. Aurelio Martín calificó de “tomadura de pelo” la respuesta que’l gobiernu central-y dio al diputáu d’IU Gaspar Llamazares en preguntando pola supresión del peaxe del Güerna y de “auténtica estafa” pa los asturianos la prórroga d’esti sistema de pagu hasta l’añu 2050. Pal diputáu autonómicu d’IX-BA la respuesta del executivu de Madrid a les preguntes del so grupu nel parlamentu español “nun concreten nin detallen plazos, fórmula nin manera d’entamar la posible suspensión del peaxe”. Na esposición de la iniciativa del grupu parlamentariu d’Izquierda Xunida-Bloque, Martín refugó la posibilidá barruntada pol Ministeriu de Fomentu de facer una “autovía alternativa”, al Güerna, a la que se refirió como “una ocurrencia de duldosa execución y un auténticu despilfarru de dineru”. Con tal fin la coalición presentó una proposición non de llei énte la Xunta Xeneral pa qu’enantes de finar l’actual periodu de sesiones se discuta y llogre’l sofitu de tolos grupos parlamentarios. La iniciativa pide una respuesta al gobiernu de Madrid a la pitición de suprimir el peaxe de l’autovía A-66 y qu’esa respuesta se dea nun plazu non más grande de tres meses a cuntar dende’l momentu de plantease esti encamientu pa que se concrete plazos y fórmules pa facer francu el pasu de vehículos pel Güerna. 12 de xunu, 2005 0 FacebookTwitterPinterestEmail
Sociedá Migoya respuende a IX que’l Gobiernu nun va mudar el so procedimientu pa la reforma l’Estatutu by asturnet 9 de xunu, 2005 El Gobiernu asturianu respondió ayer a la propuesta d’Izquierda Xunida sobre la reforma del Estatutu y la comenencia d’algamar un alcuerdu previu ente los partíos integraos nel executivu enantes de la so discusión na Xunta Xeneral. Al través de la so portavoz, la conseyera Ana Rosa Migoya, el gobiernu que preside Vicente Álvarez Areces, refugó la posibilidá de pactar el borrador de la reforma ente PSOE y IX-Bloque enantes de llevalo al parlamentu y afirmó que l’executivu autonómicu “nun va mudar nin el calendariu nin el procedimientu” pal nuevu Estatutu. La portavoz del gobiernu del Principáu fexo esta afirmación acabante’l Conseyu de los xueves, na rueda informativa na que dio cuenta de los alcuerdos adptaos pol executivu na so reunión. Contestaba asina a la propuesta llanzada ayer pol coordinador d’Izquierda Xunida d’Asturies, Jesús Iglesias pa que les llinies básiques del borrador de la reforma estatutaria fueran consensuaes ente los partíos integrantes del tripartitu asturianu enantes de llevalo al parlamentu autonómicu. Na so propuesta Iglesias punxo como modelu a siguir el nuevu estatutu de la Comunidá Valenciana, sobremanera nos puntos onde había una mayor dixebra ente PSOE ya IX-BA, como la oficialidá del asturianu o la declaración d’Asturies como nacionalidá hestórica. Ana Rosa Migoya apuntó a que’l gobiernu va disponer bien lluego de los informes encargaos a la comisión d’espertos sobre la reforma del estatutu y que ser d’esi momentu pa en delantre cuando entame’l procesu de consultes coles fuerces polítiques representaes nel parlamentu col oxetivu d’algamar, lo que calificó de un documentu óptimu. Esi borrador de mínimos diba ser sobre’l que había desenvolvese el debate na Xunta Xeneral. Per otru llau, la mesa de la Xunta Xeneral, a pitición del grupu popular, reprobó a la conseyera de Cultura y Comunicación pol so retardu n’apurrir al parlamentu tola información sobre l’Ente Públicu de Comunicación. El diputáu del PP Fernando Goñi calificó l’actitú del gobiernu de “falta de respetu” al so grupu y “oscurantistu por ocultar información que’l nuestru grupu lleva demandando dende que se punxeron en marcha los trámites pa la creación de la televisión autonómica”. 9 de xunu, 2005 0 FacebookTwitterPinterestEmail
Sociedá IX quier que’l nuevu Estatutu imite al valencianu na reconocencia de la oficialidá y la nacionalidá by asturnet 8 de xunu, 2005 El coordinador xeneral d’Izquierda Xunida d’Asturies Jesús Iglesias desplicó ayer n’Uviéu la posición de la so organización ente la reforma l’Estatutu y la ufierta llanzada pol presidente del Principáu Vicente Álvarez Areces pa entamala dende’l consensu políticu. Iglesias amosóse partidariu d’esi consensu y punxo como modelu a siguir el nuevu estatutu de la Comunidá Valenciana, sobremanera pa superar los puntos que más separen a IX del PP y el PSOE, ente los que citó la reconocencia d’Asturies como nacionalidá hestórica y la oficialidá pa la llingua asturiana. Iglesias, al empar, apostó por un alcuerdu dientro’l gobiernu PSOE-IX-Bloque previu al debate de la reforma na Xunta Xeneral Pa Jesús Iglesias, énte la posibilidá de que PSOE y PP llegaren a un pactu a nivel d’estáu ye preferible que “tanto si ye frutu del alcuerdu de les dos fuerces mayoritaries nel ámbitu del Estáu, PP y PSOE o surda dende una Comunidá Autónoma sedria malo”,y apuntó que, “lo qu’hai que facer nesti procesu, cuando lu tamos plantegando toos, dígase abiertamente o non, ye una revisión del Modelu d’Estáu que surdió de la Constitución del 78 col enfotu de que lo qu’agora se defina, tea una vixencia temporal asemeyada, y que nos ha llevar, sobre too, a que seya la voluntá de caúna de les Comunidaes Autónomes les que determinen el nivel d’autogobiernu”. Nesi sen, consideró esencial que “nel momentu d’entamar nun haya diferencies, que toos tengan les mesmes oportunidaes, pero que seya la demanda de cada Comunidá Autónoma, que seya la voluntá de los ciudadanos d’eses Comunidaes Autónomes les que fixen el techu, que nun haya un techo d’aniciu”. Nesi sen, desplicó el so coordinador, IX d’Asturies entiende, que’l proyectu que se tien d’aprobar nos primeros díes de Xunu na Comunidá Autónoma Valenciana, pue ser un bon aniciu pal alderique notres Comunidaes Autónomes y tamién n’Asturies, “pero nun tien de ser el techu que nos coloquen el PP y el PSOE a tolos españoles en toles Comunidaes Autónomes”. Iglesias comentó qu’esti proyectu d’Estatutu nun satisfaz a IX de Valencia, ya que quieren aldericar y seguir discutiendo sobre elli. Dende Asturies, IX cree qu’hai que ser coscientes de la realidá y peculiaridaes, pa introducir, a partir de esa propuesta, elementos que satisfagan los niveles y les necesidaes d’autogobiernu d’Asturies. Jesús Iglesias destacó asina mesmo dalgunos elementos d’este borrador que nun coinciden, nel entamu polo menos, coles posiciones anunciaes tanto pol PSOE d’Asturies como pol PP. Ente ellos destacó que “hai elementos positivos pa que nadie nun se llame a engañu y pa que cuando se diga qu’esa propuesta pue servir como elementu d’alderique nesta Comunidá Autónoma, nun se faiga esi plantegamiento dende la ignorancia o’l rechazu de los rasgos más destacables y positivos d’este borrador de Estatutu de la Comunidá Autónoma Valenciana. Ente estos destacó, que nos conteníos del Proyectu hai un reconocimientu de la necesidá d’ampliar los drechos civiles y sociales de los ciudadanos. De la voluntá d’ir más allá de los conteníos de la Constitución Española en cuanto a drechos y llibertaes por citar sólo ún mui significativu y que coincide con un plantegamientu reciente n’Asturies, el proyectu de Valencia, reconoz como un drechu más a los ciudadanos d’esa Comunidá Autónoma el tener una Renta Garantizada de Ciudadanía, “colo que costó n’Asturies llegar a esi convencimientu” afirmó.En segundu llugar, el proyectu de la Comunidá Autónoma Valenciana, define a esa Comunidá como Nacionalidá Histórica y “eso ye algo que nosotros reivindicamos pa Asturies porque les pallabres les carga’l diañu y los conceptos y los conteníos, a lo postrero cuando se ta falando de Modelu d’Estáu de proyectu d’Estáu acaben teniendo consecuencies mui importantes y mui relevantes y sigún seyas Comunidá Histórica o non, les tos posibilidaes d’autogobiernu son mayores o non”. Iglesias tamién punxo como exemplu el compromisu claru del borrador de la Comunidá Valenciana, pa cola llingua propia d’esa comunidá, compromisu qu’IX quier que s’espeye tamién n’Asturies cola llingua asturiana, al traviés del so reconocimientu idoma oficial. Siguiendo cola so comparanza ente’l nuevu estatutu valencianu y el qu’IX quier p’Asturies, Iglesias remembró que nel proyectu de la comunidá levantina establécense la posibilidá de disolución anticipada de la Cámara de les Cortes Valencianes, y “nel nuestru casu de la Xunta Xeneral del Principáu, ensin denguna llende, lo que na práctica conlleva que si se da una disolución anticipada de la Cámara, la celebración d’elecciones nun va encaxar ya con esi modelu xeneral de les Comunidaes Autónomes del 143 qu’hasta agora se caltien en que toles del 143 tienen que tener les sus elecciones na mesma fecha, polo que’l nivel de capacidá de decisión política de los asturianos viérase xorrecer d’una manera bultable ensin dengún condicionante temporal”. Nel borrador de les Cortes de Valencia apuéstase por un Tribunal Superior de Xusticia de la Comunidá Autónoma que seya última instancia nesa Comunidá Autónoma, inclusu apunta una posibilidá ensin definir ni concretar d’una especie de Conseyu Xeneral del Poder Xudicial de la Comunidá Autónoma, cuando les reformes nel ámbitu del Estáu lo permitan. Darréu, Jesús Iglesias, quiso destacar un elementu más, “amplíase’l númberu de diputaos, descentralícense tamién les competencies de la Comunidá Autónoma a los Municipios y faise con un compromisu políticu mui importante, el que cualaquier pautu local na Comunidá Autónoma tendría de dir acompangáu de la tresferencia nun sólo de la competencia, sinon tamién de los recursos económicos necesarios pal so exerciciu” El coordinaor d’IX d’Asturies apuntó tamién l’ampliación “de manera notable de les Competencies, como’l Réxime Local (montes, aprovechamientu, servicios forestales); Ordenación Farmacéutica (Colexos profesionales); Defensa de los Consumidores; Protección Civil. Toes estes materias nel nuestru Estatutu d’Autonomía son de desendolcu lexislativu, nel borrador Valencianu son materies esclusivas de la Comunidá Autónoma”. 8 de xunu, 2005 0 FacebookTwitterPinterestEmail
Sociedá Giovanni Sartori, Premiu Príncipe d’Asturies de Ciencies Sociales 2005 by asturnet 7 de xunu, 2005 Consideráu ún de los protagonistes del debate políticu contemporáneu, la obra de Giovanni Sartori convirtióse nun elementu clave na ciencia política de les dos últimes decades. Espertu nos problemes actuales de los sistemes democráticos d’Occidente, nes sos obres aborda la pluralidá social contemporánea y la necesidá d’asumila evitando la fragmentación. El xuráu d’esti premiu –convocáu pola Fundación Príncipe d’Asturies- tuvo presidíu por Manuel Fraga Iribarne, ya integráu tamien por Gonzalo Anes, Carmen Caffarel, Pilar del Castillo, Adela Cortina, Álvaro Cuervo, Carlos Espinosa de los Monteros, Ángel Gabilondo, Jose Luis García Delgado, Manuel Jesús González, Luis González Seara, María del Carmen Iglesias, Juan Antonio Martínez Camino, Hans Meinke, Aurelio Menendez, Adolfo Menendez, Ana Rosa Migoya, Jose Oliu i Creus, Jose Manuel Otero Novas y Juan Vázquez (secretariu). Giovanni Sartori nació en Florencia (Italia) en 1924. Licencióse en Ciencias Sociales na Universidá de Florencia en 1946. Tien dao clases de Filosofía Moderna, Lóxica y Doctrina del Estáu nes universidaes estadounidenses de Stanford, Yale, Harvard, así como nel Institutu Universitariu Europeu (Florencia). Ye profesor emeritu de la Universidá de Florencia, centru actual de la ciencia política italiana y ún de los referentes de la ciencia política mundial, y ocupa la cátedra Albert Schweitzer n’Humanidaes na Universidá de Columbia (Nueva York). En 1971 fundó la Revista Italiana de Ciencia Política, qu’anguaño dirixe a comuña con Mauricio Ferrera. Autor traducíu a más de trenta idiomes, ente les sos obres destaquen “Ingeniería constitucional comparada” (1994), “¿Que es la democracia?” (1997) y “Homo Videns: la sociedad teledirigida” (1998), nel que reflexona sobre’l peligru individual y social de la televisión. En 2001 publicó “La sociedad multietnica. Pluralismo, multiculturalismo y extranjeros”. De les sos primeres obres, dalgunes consideraes clásicos, pueden citase “Political development and political engineering” (1968), “Partiti e sistemme di partito” (1976) –pol que recibió’l Outstanding Book Award de l’Asociación Americana de Ciencia Política–, “The influence of electoral systems: Faulty laws or faulty method” (1986) y “The theory of democracy revisited” (1987), ente otros. Miembru de l’Academia Nazionale dei Lincei, dende 1988, ye vicepresidente de la Societá Libera, destinada al estudiu y promoción de los ideales lliberales na sociedá. Amás, ye doctor honoris causa poles universidaes de Genova (Italia), Georgetown (Washington), de Guadalajara (Mexico), de Buenos Aires, (Argentina), Complutense (Madrid) y Bucarest (Rumania). Collabora como editorialista nel Corriere della Sera. Precisamente, ún de los sos artículos publicaos nesti diariu, “La televisión, un monopolio y dos sombreros”, fíxolu merecedor en 2004 del premiu de periodismu Manuel Ibáñez Escofet, qu’otorga la Fundació Catalunya Oberta. Recibió la Medalla d’Oru al Meritu Cultural y Educativu d’Italia, Medalla d’Oru de la Instrucción Pública al Meritu de la Escuela, la Cultura y l’Arte y ye sociu de l’Academia Americana de les Artes y les Ciencies. Ye Comendador de la Ordem do Cruceiro do Sul de Brasil. Los Premios Príncipe d’Asturies tán destinaos, según los Estatutos de la Fundación, a galardonar “la llabor científica, tecnica, cultural, social y humana realizada por persones, equipos de trabayu o instituciones nel ámbitu internacional”. Dientro d’esti espíritu, el Premiu Príncipe d’Asturies de Ciencies Sociales “será concedíu a la persona, grupu de persones o institución cuyu llabor creador o d’investigación nos campos de l’Antropoloxía, Derechu, Economía, Xeografía, Historia, Psicoloxía, Socioloxía y demás Ciencies Sociales represente una contribución relevante al desarrollu de les mesmas en beneficiu de la Humanidá”. A esti Premiu optaben un total de 31 candidatures, procedentes d’Alemania, Belxica, Bulgaria, Canadá, Colombia, Ecuador, Estaos Xuníos, Etiopía, Filipinas, Francia, India, Italia, Xapón, Mexico, Paraguay, Portugal, Reino Unido y España. Ésti ye’l tercer de los ocho Premios Príncipe d’Asturies concedíos esti añu, nel que cumplen la so vixesimu quinta edición. Anteriormente fueron otorgaos el Premiu Príncipe d’Asturies de Cooperación Internacional a la ex presidenta del Parlamentu Europeu, Simone Veil, y el de Ciencies Sociales a los Grandes Institutos Culturales Europeos. Nes prósimes selmanes van fallase los correspondientes a Lletres, Investigación Científica y Tecnica y Artes. Los Premios Príncipe d’Asturies de Concordia y Deportes van fallase el prósimu mes de setiembre. Cadún de los Premios Príncipe d’Asturies, concedíos per primer vez en 1981, ya dotáu con cincuenta mil euros, la escultura creada y donada espresamente por Joan Miró pa estos galardones, un diploma y una insignia acreditativos. Los Premios Príncipe d’Asturies cellebran esti añu’l so XXV Aniversariu, col auspiciu de la UNESCO. L’actu inaugural tuvo llugar el pasáu 12 d’abril n’Uvieu con una conferencia estraordinaria del profesor Stephen Hawking, Premiu Príncipe d’Asturies de la Concordia en 1997, y que tuvo presidida polos Príncipes d’Asturies. El segundu actu, un encuentru multitudinariu de Woody Allen, Premiu Príncipe d’Asturies de les Artes 2002, col públicu, cellebróse’l pasáu 14 de mayu. Los actos de cellebración van durar hasta finales de 2006. 7 de xunu, 2005 0 FacebookTwitterPinterestEmail
Sociedá El profesor Francisco Llera va ser el pregoneru de la décima Fiesta de la Oficialidá de Bimenes by asturnet 5 de xunu, 2005 La X Fiesta de la Oficialidá de Bimenes quier ser dalgo más qu’una rutinaria conmemoranza de la so década d’esistencia y los responsables de la so organización van entamar l’aniversariu convirtiendo a lo llargo de siete díes el conceyu yerbatu nel centru de la cultura asturiana más viva. El profesor de la Universidá del País Vascu y académicu de la Llingua Francisco Llera Ramo va ser l’encargáu d’echar el prólogu d’esta atopada onde se combinen reivindicación, creatividá y folixa. La décima edición de la Fiesta de la Oficialidá de Bimenes ya tien el so programa cerráu y les feches marcaes pa remembrar que’l motivu pol que nació, la llucha pola reconocencia oficial de la nuestra llingua, sigue siendo una cuestión pendiente una década después. El conceyu yerbatu va convertise nel centru de la cultura asturiana más viva ente los díes 24 de xunu y 2 de xunetu. Debates, conferencies, esposiciones, actuaciones musicales, teatrales, pasucáis, baile, tonada, igüen el programa d’esta X Fiesta de la Oficialidá, que va acoyer tamién la II Feria d’Artesanía y Industria Agroalimentaria. La presentación oficial de la folixa ye’l prósimu 24 de xunu a les 20.00 hores na Casa Cultura de San Xulián, un actu que va pesllase con un conciertu del cantautor Toli Morilla. Nel memu sitiu inaugúrase el llunes 27 de xunu la esposición “Humor gráficu asturianu(2ª parte)”, cedía pola Obra Social y Cultural de Caxastur. Al día siguiente y a la mesma hora va entamase una mesa alderique entamada pola Xunta pola Defensa la Llingua y titulada “La Oficialidá na reforma del Estatutu”. El miércoles 29 la Casa Cultura -la sé de la mayoría de los actos- acueye la conferencia “El movimientu obreru y la llingua asturiana(1900-1937)” a cargu del hestoriador Rafael Rodríguez Valdés. Los actos siguen na tarde del 30 de xunu cola representación de la obra “Una hora ensin televisión” pol grupu de teatru Telón de Fondo. El viernes 1 de xunetu a les 18.00 hores va entamase una nueva mesa alderique, nesta ocasión sobre la escolarización del asturianu y del mirandés. Darréu, a les 19,30 va celebrase l’actu d’entrega de los premios del VIII Concursu de Cuentos pola Oficialidá y a les 21,00 va haber un certame de monólogos cola participación de Milio’l del Nido y Cellero. El sábadu 2 de xunetu inaugúrase nel Prau la Fiesta de La Vegona la III Feria d’Artesanía y la Industria Agroalimentaria. A les 12,30 del meudía Francisco Llera Ramo, caderalgu de Ciencia Política de la UPV y miembru de l’Academia de la Llingua, ye l’encargáu d’echar el pregon de la X Fiesta pola Oficialidá. A lo llargo de la mañana pasucais de grupos asturianos y Los Pauliteiros de Miranda do Douro van recorrer la capital yerbata. A les 13,00, después del pregón, va celebrase una misa n’asturianu y cantada pol grupu “El Corriellu la Pandorga”. Una actuación de los grupos folklóricos participantes nel pasucais y una xinta popular, consistente nuna arrozada a l’asturiana, van dar pasu a les actividaes programaes pa pela tarde. A les 17,00 nel Prau la Fiesta entama una amosanza d’entibadores mineros a cargu del Club Deportivu d’Entibadores del Caudal. Les actuaciones musicales empiecen a les 19,30 con un festival de tonada nel que van cantar El Che de Cabaños, Annabel Santiago y Ismael Tomás. Pela nueche a les 20,00 hores va ser el turnu pa ver nel escenariu al grupu Xera y a Los Berrones, que van sen los encargaos de poner remate a esta X Fiesta de la Oficialidá. 5 de xunu, 2005 0 FacebookTwitterPinterestEmail
Sociedá La llucha contra la probitú y pol desarrollu centra’l II Foru Solidariu que se celebra en Llangréu by asturnet 5 de xunu, 2005 Esti llunes 6 a les 19,30 inaugúrase en Llangréu, nel Teatru de Sama, el II Foru Solidariu entamáu pola Axencia Asturiana de Cooperación y que se presenta embaxo’l lema: “Contra la probitú.Ensin xusticia social nun hai paz”. A lo llargo de les xornaes que van entamase nos prósimos díes los distintos ponentes van tratar temes como los retos del desarrollu nel tercer mileniu, el comerciu xustu o muyer y probitú. El viernes 10 un festival de baldre con Annabel Santiago, Kekele y Macaco va poner el pieslle a esti alcuentru nel que se quier reflexonar y llamar l’atención sobro la solidaridá activa como forma de lluchar contra la inxusticia social en mundu. Al actu inaugural d’esta tarde ta previsto qu’acudan el conseyeru de Xusticia y Esteriores del Principáu, Francisco Javier García Valledor y el director de l’Axencia Asturiana de Cooperación Rafael Palacios. El responsable de l’Axencia Española de Cooperación Internacional, Juan Pablo de Laiglesia tamién ta previsto qu’intervenga na xornada inaugural del Foru, que va tar presidida pola alcaldesa de Llangréu, Mª Esther García. Los debates empiecen esti martes 7 a les 20,00 na Casa la Cultura de La Felguera con una ponencia titulada “Oxetivos de Desarrollu del Mileniu y llucha contra la probitú”, nel que van participar Marina Ponti, coordinadora de la Campaña Oxetivos del Mileniu pa Europa; Fernando Casado, coordinador de la mesma campaña pal Estáu español; y na que va actuar como moderador el caderalgu d’Hestoria Medieval de la Universidá d’Uviéu y académicu de la Llingua, Javier Fernández Conde. El miércoles 8 a les 19,30 na Casa la Cultura de Sama va ser la ponencia “El comerciu xustu como otru calce de Cooperación al Desarrollu” la que centre’l debate, cola presencia de Carola Reintjes, presidenta d’IDEAS y miembru del Conseyu Internacional del Foru Social Mundial, y Paz d’Andrés Santamaría, caderalga de Drechu Internacional de la Universidá d’Uviéu. El tercer debate va llevar el títulu “Muyer y probitú” y va entamar el xueves 8 a les 19,30 na Casa la Cultura de la Felguera cola participación d’Ana Falú, directora rexonal de la oficina d’UNIFEM pal Brasil y los países del COnu Sur, y Aquilina Fueyo, decana de la facultá de CIencies de la Educación d’Uviéu. La última xornada del Foru va ser eminentemente festiva con un conciertu de baldre nel recintu ferial de Ciañu nel que van actuar l’asturiana Annabel Santiago, los africanos Kekele y el catalán Macaco. Al empar el prósimu 15 de xunu va inaugruase na Sala d’Esposiciones de Sama l’amuesa fotográfica “Escueles d’otros mundos” de Kim Manresa. 5 de xunu, 2005 0 FacebookTwitterPinterestEmail
Sociedá Amigos de los Bables advierte “una deriva oficializante” nel Plan by asturnet 5 de xunu, 2005 Josefina Martínez, Gustavo Bueno, Jesús Neira y Modesto González Cobas, remitieron un escritu a diversos medios asturianos nel que truñen contra’l Plan de Normalización Social de la llingua asturiana, recientemente puestu a discusión na Xunta Xeneral, nel qu’advierten “una deriva oficializante que desborda el réximen xurídicu establecíu na Constitución y el Estatutu”. Amigos de los Bables escusa nel escritu la so ausencia na Comisión de Cultura del parlamentu asturianu y defenden la negativa a crear una especialidá de Filoloxía Asturiana. Pa los firmantes la recuperación del asturianu “namás diba valir pa aislar a los sectores menos favorecíos económicamente”. Los cuatro firmantes del escritu afirmen qu’ente la “imposibilidá material” d’asistir a les comparecencies del pasáu 30 de mayu na Xunta Xeneral formularon les sos opiniones sobre’l Plan de Cultura por escritu nun documentu del qu’acusen a los medios de comunicación de silenciar. Un resume d’esi documentu ye l’escritu que Amigos de los Bables unviaron a diversos medios y qu’hasta agora namás tien recibío l’apoyu de la Comunión Tradicionalista Carlista del Principado de Asturias. Los tradicionalistes afirmen nel so comunicáu que “les diverxencies notables col ideariu de dalgunos de los firmantesno nun nos impiden suscribir los sos argumentos, axustaos a la realidá y cargaos d’asturianismu de bona llei”. Los carlistes recuerden que munchos de los escritores n’asturianu del sieglu XIX y XX profesaron el mesmu ideariu qu’ellos y desixen “que cese el marafundiu de recursos públicos pa la construcción d’una falsa identidá asturiana (en too opuesta a la verdadera) y el mantenimientu clientelar d’un ciertu abertzalismu autóctonu”. L’apoyu de los tradicionalistes ye l’únicu col que cuenta hasta agora l’escritu firmáu por Josefina Martínez, Gustavo Bueno, Jesús Neira y Modesto González Cobas. Nél Amigos de los Bables critica la forma na que s’elaboró y aprebó el Plan de Normalización, ensin sometelu a información pública, lo que consideren “una omisión indesplicable”, ya qu’en tratándose de “una supuesta «normalización social» resulta, en efectu, inconcebible nun consultar a la sociedá enantes de decidir la necesidá, el conteníu y el algame de la normalización. Los firmantes critiquen tamién la metodoloxía empleada pola Xunta de Toponimia y “la falta de consensu na materia”; defenden tamién la negativa a crear una titulación de Filoloxía Asturiana, sobre la que dicen “esiste unanimidá na llinia na que vien inscribise la nuestra asociación”. Nel escritu Amigos de los Bables desenvuelve una serie de considerances xenerales sobre la realidá llingüística asturiana na que caltienen que “l’estáu actual de les fales asturianes nun cambió muncho en sieglos”, a nun ser pola influencia del español y que col “predominiu y xeneralidá del español pa toles actividaes que nun sean les d’escasu radiu d’acción de l’aldea y del valle, ye inútil pretender la propagación de la nueva variedá artificial que llamen «llingua», non falada en parte dalguna, que terminaría por facer desapaecer les fales vives y espontánees”. . 5 de xunu, 2005 0 FacebookTwitterPinterestEmail
Sociedá L’Academia busca’l sofitu de les instituciones pal so pautu social by asturnet 2 de xunu, 2005 L’Academia de la Llingua sigue la so ronda de contacto pa esponer les llinies esenciales del alcuerdu que propón alrodiu de la llingua y la cultura asturiana. Ayer tocó-y el turnu a la presidenta de la Xunta Xeneral del Principáu que recibió a una delegación de la másima institución llingüística na que la presidenta de l’Academia dio cuenta de la necesidá d’entamar un gran pautu social qu’incluya la oficialidá, la normalización efectiva de la llingua y la dignificación de la nuestra cultura en tolos niveles de la vida pública. Ana Cano acudió a la reunión cola presidenta del parlamentu asturianu acompañada de los tamién académicos Xosé Antón González Riaño y Próspero Morán. Tolos tres espunxeron la propuesta llanzada pola Academia de la Llingua l’últimu Día de les Lletres, la d’un gran pautu social, nel qu’axentes sociales, grupos políticos ya instituciones se comprometan a xuntase alrodiu d’unos puntos mínimos sobre la llingua y la cultura asturianes. L’Academia dio a conocer va unos díes l’acoyida favorable que taba teniendo la so propuesta ente les distintes organizaciones polítiques y sindicales a les que se-yos espunxera y anunciaba una nueva ronda de contactos nes instituciones, incluíos los grupos parlamentarios representaos na Xunta Xeneral. Ayer celebróse la primer d’estes reuniones na sé del parlamentu asturianu cola so presidenta. Hasta agora el másimu organismu en materia llingüística del Principáu caltuvo reuniones coles organizaciones sindicales UXT, Comisiones Obreres, USO, SUATEA y Corriente Sindical d’Izquierda, asina como cola mayoría de los grupos políticos nacionalistes y asturianistes, amás d’organizaciones sociales implicaes na defensa de los drechos llingüísticos. Na valoración que fai l’Academia d’estos alcuentros amúesase contenta. Agora l’espardimientu de la so propuesta va tener una segunda fase a lo llargo de la primer quincena de xunetu col treslláu de los conteníos de la ufierta de pautu al gobiernu autonómicu, al central, a la Xunta Xeneral del Principáu y a los grupos parlamentariod presentes nella. La propuesta scadémica nomada Alcuerdu Social y Políticu sobre la Llingua y la Cultura dAsturies, resúmese nos siguientes puntos:reconocimientu del asturianu como llingua co-oficial nel Estatutu dAutonomía dAsturies; afitamientu de los conteníos de la normalización y plazos na so puesta en práutica; pautu presupuestariu, conseñandol mínimu necesariu pa facer vidable y efeutivu lusu social de la llingua;dignificación, recuperación y divulgación de la cultura asturiana (arte, folklore, etnografía, historia, música ) nel ámbitu educativu; inxerimientu de lAntropoloxía Cultural Asturiana, nel nivel que correspuenda, dientro de la Universidá dUviéu. Na nota de prensa emitía ayer l’Academia de la Llingua afima que ta enfotada en “que les perbones perspeutives quhasta esti momentu sacolumbren puedan confirmase coles xuntes que van caltenese nes próximes selmanes y que, en definitiva, lalcuerdu pueda ser una realidá a mediu plazu” y anuncia que la institución dirá informando públicamente de les novedaes que se vayan produciendo a lo llargo del procesu d’espardimientu de la so propuesta. 2 de xunu, 2005 0 FacebookTwitterPinterestEmail
Sociedá L’Observatoriu afala a consolidar la rede municipal de normalización by asturnet 31 de mayu, 2005 L’Observatoriu Llingüísticu aconceyó el pasáu viernes 27 n’Uviéu pa tratar dellos asuntos d’actualidá referíos a la llingua asturiana y al cumplimientu del Plan de Normalización Social del Principáu. Nuna nota pública datada na tarde d’ayer la plataforma independiente amuesa el so contentu pola oficialización de los topónimos de Carreño, El Franco y Llanes. L’Observatoriu reconoz “l’esfuerzu que dende la Conseyería de Cultura se ta faciendo por impulsar la política llingüística nel ámbitu municipal”, inda pide cambiar la política de subvenciones a los conceyos por fórmules más segures. A la fin, la plataforma, espresa la so esmolición pol refugue a la titulación de Filoloxía Asturiana y el casu de discriminación llingüística sufríu por un alumnu de la Universidá d’Uviéu. El comunicáu que firmen los diecisiete miembros actuales del Observatoriu, toos ellos persones vinculaes al mundu cultural asturianu y a la vida pública de la nuestra comunidá, escomienza amosando la satisfacción de la plataforma pola oficialización de los topónimos de los tres primeros conceyos en llogralo, dalgo que califiquen de “pasu históricu, llargamente naguáu polos defensores del asturianu, y que pon fin a una trayectoria frustrante de venti años de la Xunta Asesora de Toponimia”. Pal Observatoriu esta oficialización de topónimos significa “dar cumplimientu a un aspectu importante del Plan de Normalización Social del Asturianu (na so Acción 36)” y felicita a los integrantes de la Xunta de Toponimia “pol so trabayu rigorosu y intensu, buscando l’acuerdu colos Conceyos y coronando col ésitu’l so llabor”, al tiempu que afala al Gobiernu “a que siga per esti camín, aprobando más Decretos d’oficialización toponímica y faciendo aplicar esta oficialidá nos usos institucionales de toa mena”. El segundu asuntu analizáu pol Observatoriu na so última reunión foi el de l’espardimientu d’una rede municipal de servicios de normalización, un llabor nel que reconocen “l’esfuerzu que dende la Conseyería de Cultura se ta faciendo por impulsar la política llingüística nel ámbitu municipal, fomentando la creación y caltenimientu de Servicios o Oficines de Política Llingüística en diversos conceyos y mancomunidaes”, inda afirmen que l’actual sistema de sofitar económicamente a estos organismos vía subvención “nun ye’l camín óptimu, dao que nun pue asegurar dafechu la estabilidá de los Servicios de Normalización, nin la estabilidá llaboral de les persones responsables, nin tampoco afita una planificación concertada ente la Conseyería y los Servicios”. Nesi sen piden que se “aperie fórmules más segures, como la de los convenios ente la Conseyería y los Conceyos qu’afiten un mayor compromisu ente les dos partes y garanticen el crecimientu de la Rede”. Los otros dos asuntos trataos nel aconceyamientu del Observatoriu del pasáu viernes refiérense a la situación de la llingua asturiana na Universidá. El primeru val a la plataforma pa espresar la so preocupación ente les dificultaes qu’un doctorandu de la Facultá d’Hestoria ta atopando pa inscribir la so tesis n’asturianu “pol simple fechu d’entregar la documentación n’asturiano”. A esi propósitu l’Observatoriu “quier facer notar a la Universidá d¹Uviéu que los sos servicios xurídicos nun puen dar carta de naturaleza a actuaciones que van contra derechu, conculcando lo qu¹establez la Llei d¹Usu y Promoción del Asturianu, que garantiza¹l derechu de cualesquier ciudadanu a usar llibremente la llingua asturiana (artículos 3 y 4), y los propios Estatutos de la Universidá d¹Uviéu, qu¹amparen el mesmu derechu pa los miembros de la comunidá universitaria (artículu 6.2”, tamién apelen “d’acordies cola Acción 27 del Plan de Normalización al Gobiernu d¹Asturies a que faiga les xestiones oportunes pa evitar una situación intolerable que tien que tar superada.”. El refugue a la creación d’una titulación específica de Filoloxía Asturiana ye l’últimu de los asuntos a los que se refier l’Observatoriu nel so comunicáu. Esta plataforma considera “necesario que les autoridaes universitaries actúen cola máxima claridá informativa respecto a cuáles son les pretensiones y negociaciones concretes pa con eses titulaciones” y solicita una reunión cola decana de la Facultá de Filoloxía pa celebrar “una entrevista de tipu informativu sobre la cuestión”, al tiempu qu’anuncien van dirixise a otres universidaes pa interesase pol tema. Al empar, l’Observatoriu Llingüísticu emplaza al Gobiernu asturianu a que “d¹acuerdu cola Acción 28 del Plan de Normalización y col determín tomáu de recién pola Xunta Xeneral del Principáu, apoye a la Universidá, llegáu¹l momentu, na creación d¹eses titulaciones”. El comunicáu del Observatoriu apaez firmáu porFrancisco Álvarez, escritor y periodista; Ramón Lluis Bande, escritor y director de cine;Xuan Bello, escritor y miembru de l’Academia de la Llingua Asturiana; Adolfo Camilo Díaz, xestor cultural y miembru de l’Academia de la Llingua Asturiana;Xandru Fernández, escritor y profesor;Manuel Fernández de la Cera, presidente del Conseyu de Comunidaes Asturianes y ex-conseyeru de Cultura del Principáu; Cesáreo García, filólogu y responsable de la Oficina de Normalización Llingüística del Conceyu d¹Avilés;Ismael González Arias, escritor y director de la Casa de Cultura de Mieres;Vanessa Gutiérrez, escritora;Francisco J. Llera Ramo, catedráticu de Ciencia Política y miembru de l¹Academia de la Llingua Asturiana;Taresa Lorences, escritora;Pedro Alberto Marcos, director de Televisión Española n¹Asturies; Noemí Martín, diputada d’Izquierda Xunida; Gonzalo Olmos, conceyal del PSOE nel Ayuntamientu d’Uviéu;Berta Piñán, escritora;José Uría Ríos, profesor; y Ignasi Vila Mendiburu, miembru del Comité Internacional pa la Salvaguarda de los Drechos Llingüísticos d’Asturies. 31 de mayu, 2005 0 FacebookTwitterPinterestEmail
Sociedá El Serviciu de Normalización de Cangas ya tien responsable y va abrise nos prósimos díes by asturnet 31 de mayu, 2005 El Serviciu de Normalización de Cangas del Narcea va empezar a funcionar nos prósimos díes una vez que ya tien responsable. Después d’una primera convocatoria na que’l tribunal calificador decidiera dexar desierta la plaza, ayer martes, tres celebrase les nueves prebes, un de los candidatos, Inaciu González, algamaba la másima puntuación. Cangas xúntase asina a la rede municipal de servicios y oficines de normalización, siendo’l primer conceyu occidental en poner en marcha esti departamentu d’atención al ciudadanu. El Serviciu de Normalización Llingüística de Cangas del Narcea va abrir les sos puertes la prósima selmana na capital del conceyu y ubicáu nel Edificiu de Servicios Múltiples del centru la villa. El responsable d’esta nueva oficina de la rede municipal de normalización ye Inaciu González, uvieín d’orixe occidental, maestru de primaria y col títulu d’Espertu en Filoloxía Asturiana. La persona seleccionada algamó la másima puntuación nes pruebes realizaes ayer martes 31 pol tribunal calificador del que formaben parte el director de la Oficina de Política Llingüística del Principáu, Ramón dAndrés, y el secretariu de l’Academia de la Llingua Asturiana, Roberto González-Quevedo, amás de conceyales y técnicos municipales. Una de las primeras actuaciones del Servicio de Normalización va ser reunise coles asociaciones del conceyu pa conocer les sos necesidaes en materia llingüística y proponer un marcu de colaboración. Cangas del Narcea conviértese asina nel primer conceyu del Occidente en dar el pasu de crear un Serviciu de Normalización. El Plenu correspondiente al mes de febreru aprobó, colos votos favorables de PSOE, IU-BA y URAS, la puesta en marcha d’un serviciu que va contar, hasta avientu de 2005, coles víes de financiación que la Conseyería de Cultura destina a la creación y mantenimientu de la rede municipal de normalización. Con esta puesta andar de la oficina, la capital del suroccidente súmase a Xixón, Siero, Comarca de la Sidra, Mancomunidá de Peñes, L.lena, Llangréu y Avilés, que tamién cuenten con servicios dedicaos la normalización del asturianu dientro’l marcu los sos conceyos. Talo señalen dende l’Ayuntamientu de Cangas: “l’oxetivu d’esta oficina va ser el de facer normal a nivel institucional lo que ya ye normal na calle”. D’alcuerdu con esti planteamientu, la nueva oficina va ufiertar un serviciu permanente de traducción, elaborando documentos públicos en asturiano, incentivando la colocación de carteles indicativos en llingua asturiana ya implicando na promoción llingüística a les entidaes públiques y privaes del conceyu. La oficina va abrir nun principiu tres díes a la selmana:miércoles, xueves y viernes n’horariu de mañanes. 31 de mayu, 2005 0 FacebookTwitterPinterestEmail