Sociedá La llucha contra la probitú y pol desarrollu centra’l II Foru Solidariu que se celebra en Llangréu by asturnet 5 de xunu, 2005 Esti llunes 6 a les 19,30 inaugúrase en Llangréu, nel Teatru de Sama, el II Foru Solidariu entamáu pola Axencia Asturiana de Cooperación y que se presenta embaxo’l lema: “Contra la probitú.Ensin xusticia social nun hai paz”. A lo llargo de les xornaes que van entamase nos prósimos díes los distintos ponentes van tratar temes como los retos del desarrollu nel tercer mileniu, el comerciu xustu o muyer y probitú. El viernes 10 un festival de baldre con Annabel Santiago, Kekele y Macaco va poner el pieslle a esti alcuentru nel que se quier reflexonar y llamar l’atención sobro la solidaridá activa como forma de lluchar contra la inxusticia social en mundu. Al actu inaugural d’esta tarde ta previsto qu’acudan el conseyeru de Xusticia y Esteriores del Principáu, Francisco Javier García Valledor y el director de l’Axencia Asturiana de Cooperación Rafael Palacios. El responsable de l’Axencia Española de Cooperación Internacional, Juan Pablo de Laiglesia tamién ta previsto qu’intervenga na xornada inaugural del Foru, que va tar presidida pola alcaldesa de Llangréu, Mª Esther García. Los debates empiecen esti martes 7 a les 20,00 na Casa la Cultura de La Felguera con una ponencia titulada “Oxetivos de Desarrollu del Mileniu y llucha contra la probitú”, nel que van participar Marina Ponti, coordinadora de la Campaña Oxetivos del Mileniu pa Europa; Fernando Casado, coordinador de la mesma campaña pal Estáu español; y na que va actuar como moderador el caderalgu d’Hestoria Medieval de la Universidá d’Uviéu y académicu de la Llingua, Javier Fernández Conde. El miércoles 8 a les 19,30 na Casa la Cultura de Sama va ser la ponencia “El comerciu xustu como otru calce de Cooperación al Desarrollu” la que centre’l debate, cola presencia de Carola Reintjes, presidenta d’IDEAS y miembru del Conseyu Internacional del Foru Social Mundial, y Paz d’Andrés Santamaría, caderalga de Drechu Internacional de la Universidá d’Uviéu. El tercer debate va llevar el títulu “Muyer y probitú” y va entamar el xueves 8 a les 19,30 na Casa la Cultura de la Felguera cola participación d’Ana Falú, directora rexonal de la oficina d’UNIFEM pal Brasil y los países del COnu Sur, y Aquilina Fueyo, decana de la facultá de CIencies de la Educación d’Uviéu. La última xornada del Foru va ser eminentemente festiva con un conciertu de baldre nel recintu ferial de Ciañu nel que van actuar l’asturiana Annabel Santiago, los africanos Kekele y el catalán Macaco. Al empar el prósimu 15 de xunu va inaugruase na Sala d’Esposiciones de Sama l’amuesa fotográfica “Escueles d’otros mundos” de Kim Manresa. 5 de xunu, 2005 0 FacebookTwitterPinterestEmail
Sociedá Amigos de los Bables advierte “una deriva oficializante” nel Plan by asturnet 5 de xunu, 2005 Josefina Martínez, Gustavo Bueno, Jesús Neira y Modesto González Cobas, remitieron un escritu a diversos medios asturianos nel que truñen contra’l Plan de Normalización Social de la llingua asturiana, recientemente puestu a discusión na Xunta Xeneral, nel qu’advierten “una deriva oficializante que desborda el réximen xurídicu establecíu na Constitución y el Estatutu”. Amigos de los Bables escusa nel escritu la so ausencia na Comisión de Cultura del parlamentu asturianu y defenden la negativa a crear una especialidá de Filoloxía Asturiana. Pa los firmantes la recuperación del asturianu “namás diba valir pa aislar a los sectores menos favorecíos económicamente”. Los cuatro firmantes del escritu afirmen qu’ente la “imposibilidá material” d’asistir a les comparecencies del pasáu 30 de mayu na Xunta Xeneral formularon les sos opiniones sobre’l Plan de Cultura por escritu nun documentu del qu’acusen a los medios de comunicación de silenciar. Un resume d’esi documentu ye l’escritu que Amigos de los Bables unviaron a diversos medios y qu’hasta agora namás tien recibío l’apoyu de la Comunión Tradicionalista Carlista del Principado de Asturias. Los tradicionalistes afirmen nel so comunicáu que “les diverxencies notables col ideariu de dalgunos de los firmantesno nun nos impiden suscribir los sos argumentos, axustaos a la realidá y cargaos d’asturianismu de bona llei”. Los carlistes recuerden que munchos de los escritores n’asturianu del sieglu XIX y XX profesaron el mesmu ideariu qu’ellos y desixen “que cese el marafundiu de recursos públicos pa la construcción d’una falsa identidá asturiana (en too opuesta a la verdadera) y el mantenimientu clientelar d’un ciertu abertzalismu autóctonu”. L’apoyu de los tradicionalistes ye l’únicu col que cuenta hasta agora l’escritu firmáu por Josefina Martínez, Gustavo Bueno, Jesús Neira y Modesto González Cobas. Nél Amigos de los Bables critica la forma na que s’elaboró y aprebó el Plan de Normalización, ensin sometelu a información pública, lo que consideren “una omisión indesplicable”, ya qu’en tratándose de “una supuesta «normalización social» resulta, en efectu, inconcebible nun consultar a la sociedá enantes de decidir la necesidá, el conteníu y el algame de la normalización. Los firmantes critiquen tamién la metodoloxía empleada pola Xunta de Toponimia y “la falta de consensu na materia”; defenden tamién la negativa a crear una titulación de Filoloxía Asturiana, sobre la que dicen “esiste unanimidá na llinia na que vien inscribise la nuestra asociación”. Nel escritu Amigos de los Bables desenvuelve una serie de considerances xenerales sobre la realidá llingüística asturiana na que caltienen que “l’estáu actual de les fales asturianes nun cambió muncho en sieglos”, a nun ser pola influencia del español y que col “predominiu y xeneralidá del español pa toles actividaes que nun sean les d’escasu radiu d’acción de l’aldea y del valle, ye inútil pretender la propagación de la nueva variedá artificial que llamen «llingua», non falada en parte dalguna, que terminaría por facer desapaecer les fales vives y espontánees”. . 5 de xunu, 2005 0 FacebookTwitterPinterestEmail
Sociedá L’Academia busca’l sofitu de les instituciones pal so pautu social by asturnet 2 de xunu, 2005 L’Academia de la Llingua sigue la so ronda de contacto pa esponer les llinies esenciales del alcuerdu que propón alrodiu de la llingua y la cultura asturiana. Ayer tocó-y el turnu a la presidenta de la Xunta Xeneral del Principáu que recibió a una delegación de la másima institución llingüística na que la presidenta de l’Academia dio cuenta de la necesidá d’entamar un gran pautu social qu’incluya la oficialidá, la normalización efectiva de la llingua y la dignificación de la nuestra cultura en tolos niveles de la vida pública. Ana Cano acudió a la reunión cola presidenta del parlamentu asturianu acompañada de los tamién académicos Xosé Antón González Riaño y Próspero Morán. Tolos tres espunxeron la propuesta llanzada pola Academia de la Llingua l’últimu Día de les Lletres, la d’un gran pautu social, nel qu’axentes sociales, grupos políticos ya instituciones se comprometan a xuntase alrodiu d’unos puntos mínimos sobre la llingua y la cultura asturianes. L’Academia dio a conocer va unos díes l’acoyida favorable que taba teniendo la so propuesta ente les distintes organizaciones polítiques y sindicales a les que se-yos espunxera y anunciaba una nueva ronda de contactos nes instituciones, incluíos los grupos parlamentarios representaos na Xunta Xeneral. Ayer celebróse la primer d’estes reuniones na sé del parlamentu asturianu cola so presidenta. Hasta agora el másimu organismu en materia llingüística del Principáu caltuvo reuniones coles organizaciones sindicales UXT, Comisiones Obreres, USO, SUATEA y Corriente Sindical d’Izquierda, asina como cola mayoría de los grupos políticos nacionalistes y asturianistes, amás d’organizaciones sociales implicaes na defensa de los drechos llingüísticos. Na valoración que fai l’Academia d’estos alcuentros amúesase contenta. Agora l’espardimientu de la so propuesta va tener una segunda fase a lo llargo de la primer quincena de xunetu col treslláu de los conteníos de la ufierta de pautu al gobiernu autonómicu, al central, a la Xunta Xeneral del Principáu y a los grupos parlamentariod presentes nella. La propuesta scadémica nomada Alcuerdu Social y Políticu sobre la Llingua y la Cultura dAsturies, resúmese nos siguientes puntos:reconocimientu del asturianu como llingua co-oficial nel Estatutu dAutonomía dAsturies; afitamientu de los conteníos de la normalización y plazos na so puesta en práutica; pautu presupuestariu, conseñandol mínimu necesariu pa facer vidable y efeutivu lusu social de la llingua;dignificación, recuperación y divulgación de la cultura asturiana (arte, folklore, etnografía, historia, música ) nel ámbitu educativu; inxerimientu de lAntropoloxía Cultural Asturiana, nel nivel que correspuenda, dientro de la Universidá dUviéu. Na nota de prensa emitía ayer l’Academia de la Llingua afima que ta enfotada en “que les perbones perspeutives quhasta esti momentu sacolumbren puedan confirmase coles xuntes que van caltenese nes próximes selmanes y que, en definitiva, lalcuerdu pueda ser una realidá a mediu plazu” y anuncia que la institución dirá informando públicamente de les novedaes que se vayan produciendo a lo llargo del procesu d’espardimientu de la so propuesta. 2 de xunu, 2005 0 FacebookTwitterPinterestEmail
Sociedá L’Observatoriu afala a consolidar la rede municipal de normalización by asturnet 31 de mayu, 2005 L’Observatoriu Llingüísticu aconceyó el pasáu viernes 27 n’Uviéu pa tratar dellos asuntos d’actualidá referíos a la llingua asturiana y al cumplimientu del Plan de Normalización Social del Principáu. Nuna nota pública datada na tarde d’ayer la plataforma independiente amuesa el so contentu pola oficialización de los topónimos de Carreño, El Franco y Llanes. L’Observatoriu reconoz “l’esfuerzu que dende la Conseyería de Cultura se ta faciendo por impulsar la política llingüística nel ámbitu municipal”, inda pide cambiar la política de subvenciones a los conceyos por fórmules más segures. A la fin, la plataforma, espresa la so esmolición pol refugue a la titulación de Filoloxía Asturiana y el casu de discriminación llingüística sufríu por un alumnu de la Universidá d’Uviéu. El comunicáu que firmen los diecisiete miembros actuales del Observatoriu, toos ellos persones vinculaes al mundu cultural asturianu y a la vida pública de la nuestra comunidá, escomienza amosando la satisfacción de la plataforma pola oficialización de los topónimos de los tres primeros conceyos en llogralo, dalgo que califiquen de “pasu históricu, llargamente naguáu polos defensores del asturianu, y que pon fin a una trayectoria frustrante de venti años de la Xunta Asesora de Toponimia”. Pal Observatoriu esta oficialización de topónimos significa “dar cumplimientu a un aspectu importante del Plan de Normalización Social del Asturianu (na so Acción 36)” y felicita a los integrantes de la Xunta de Toponimia “pol so trabayu rigorosu y intensu, buscando l’acuerdu colos Conceyos y coronando col ésitu’l so llabor”, al tiempu que afala al Gobiernu “a que siga per esti camín, aprobando más Decretos d’oficialización toponímica y faciendo aplicar esta oficialidá nos usos institucionales de toa mena”. El segundu asuntu analizáu pol Observatoriu na so última reunión foi el de l’espardimientu d’una rede municipal de servicios de normalización, un llabor nel que reconocen “l’esfuerzu que dende la Conseyería de Cultura se ta faciendo por impulsar la política llingüística nel ámbitu municipal, fomentando la creación y caltenimientu de Servicios o Oficines de Política Llingüística en diversos conceyos y mancomunidaes”, inda afirmen que l’actual sistema de sofitar económicamente a estos organismos vía subvención “nun ye’l camín óptimu, dao que nun pue asegurar dafechu la estabilidá de los Servicios de Normalización, nin la estabilidá llaboral de les persones responsables, nin tampoco afita una planificación concertada ente la Conseyería y los Servicios”. Nesi sen piden que se “aperie fórmules más segures, como la de los convenios ente la Conseyería y los Conceyos qu’afiten un mayor compromisu ente les dos partes y garanticen el crecimientu de la Rede”. Los otros dos asuntos trataos nel aconceyamientu del Observatoriu del pasáu viernes refiérense a la situación de la llingua asturiana na Universidá. El primeru val a la plataforma pa espresar la so preocupación ente les dificultaes qu’un doctorandu de la Facultá d’Hestoria ta atopando pa inscribir la so tesis n’asturianu “pol simple fechu d’entregar la documentación n’asturiano”. A esi propósitu l’Observatoriu “quier facer notar a la Universidá d¹Uviéu que los sos servicios xurídicos nun puen dar carta de naturaleza a actuaciones que van contra derechu, conculcando lo qu¹establez la Llei d¹Usu y Promoción del Asturianu, que garantiza¹l derechu de cualesquier ciudadanu a usar llibremente la llingua asturiana (artículos 3 y 4), y los propios Estatutos de la Universidá d¹Uviéu, qu¹amparen el mesmu derechu pa los miembros de la comunidá universitaria (artículu 6.2”, tamién apelen “d’acordies cola Acción 27 del Plan de Normalización al Gobiernu d¹Asturies a que faiga les xestiones oportunes pa evitar una situación intolerable que tien que tar superada.”. El refugue a la creación d’una titulación específica de Filoloxía Asturiana ye l’últimu de los asuntos a los que se refier l’Observatoriu nel so comunicáu. Esta plataforma considera “necesario que les autoridaes universitaries actúen cola máxima claridá informativa respecto a cuáles son les pretensiones y negociaciones concretes pa con eses titulaciones” y solicita una reunión cola decana de la Facultá de Filoloxía pa celebrar “una entrevista de tipu informativu sobre la cuestión”, al tiempu qu’anuncien van dirixise a otres universidaes pa interesase pol tema. Al empar, l’Observatoriu Llingüísticu emplaza al Gobiernu asturianu a que “d¹acuerdu cola Acción 28 del Plan de Normalización y col determín tomáu de recién pola Xunta Xeneral del Principáu, apoye a la Universidá, llegáu¹l momentu, na creación d¹eses titulaciones”. El comunicáu del Observatoriu apaez firmáu porFrancisco Álvarez, escritor y periodista; Ramón Lluis Bande, escritor y director de cine;Xuan Bello, escritor y miembru de l’Academia de la Llingua Asturiana; Adolfo Camilo Díaz, xestor cultural y miembru de l’Academia de la Llingua Asturiana;Xandru Fernández, escritor y profesor;Manuel Fernández de la Cera, presidente del Conseyu de Comunidaes Asturianes y ex-conseyeru de Cultura del Principáu; Cesáreo García, filólogu y responsable de la Oficina de Normalización Llingüística del Conceyu d¹Avilés;Ismael González Arias, escritor y director de la Casa de Cultura de Mieres;Vanessa Gutiérrez, escritora;Francisco J. Llera Ramo, catedráticu de Ciencia Política y miembru de l¹Academia de la Llingua Asturiana;Taresa Lorences, escritora;Pedro Alberto Marcos, director de Televisión Española n¹Asturies; Noemí Martín, diputada d’Izquierda Xunida; Gonzalo Olmos, conceyal del PSOE nel Ayuntamientu d’Uviéu;Berta Piñán, escritora;José Uría Ríos, profesor; y Ignasi Vila Mendiburu, miembru del Comité Internacional pa la Salvaguarda de los Drechos Llingüísticos d’Asturies. 31 de mayu, 2005 0 FacebookTwitterPinterestEmail
Sociedá El Serviciu de Normalización de Cangas ya tien responsable y va abrise nos prósimos díes by asturnet 31 de mayu, 2005 El Serviciu de Normalización de Cangas del Narcea va empezar a funcionar nos prósimos díes una vez que ya tien responsable. Después d’una primera convocatoria na que’l tribunal calificador decidiera dexar desierta la plaza, ayer martes, tres celebrase les nueves prebes, un de los candidatos, Inaciu González, algamaba la másima puntuación. Cangas xúntase asina a la rede municipal de servicios y oficines de normalización, siendo’l primer conceyu occidental en poner en marcha esti departamentu d’atención al ciudadanu. El Serviciu de Normalización Llingüística de Cangas del Narcea va abrir les sos puertes la prósima selmana na capital del conceyu y ubicáu nel Edificiu de Servicios Múltiples del centru la villa. El responsable d’esta nueva oficina de la rede municipal de normalización ye Inaciu González, uvieín d’orixe occidental, maestru de primaria y col títulu d’Espertu en Filoloxía Asturiana. La persona seleccionada algamó la másima puntuación nes pruebes realizaes ayer martes 31 pol tribunal calificador del que formaben parte el director de la Oficina de Política Llingüística del Principáu, Ramón dAndrés, y el secretariu de l’Academia de la Llingua Asturiana, Roberto González-Quevedo, amás de conceyales y técnicos municipales. Una de las primeras actuaciones del Servicio de Normalización va ser reunise coles asociaciones del conceyu pa conocer les sos necesidaes en materia llingüística y proponer un marcu de colaboración. Cangas del Narcea conviértese asina nel primer conceyu del Occidente en dar el pasu de crear un Serviciu de Normalización. El Plenu correspondiente al mes de febreru aprobó, colos votos favorables de PSOE, IU-BA y URAS, la puesta en marcha d’un serviciu que va contar, hasta avientu de 2005, coles víes de financiación que la Conseyería de Cultura destina a la creación y mantenimientu de la rede municipal de normalización. Con esta puesta andar de la oficina, la capital del suroccidente súmase a Xixón, Siero, Comarca de la Sidra, Mancomunidá de Peñes, L.lena, Llangréu y Avilés, que tamién cuenten con servicios dedicaos la normalización del asturianu dientro’l marcu los sos conceyos. Talo señalen dende l’Ayuntamientu de Cangas: “l’oxetivu d’esta oficina va ser el de facer normal a nivel institucional lo que ya ye normal na calle”. D’alcuerdu con esti planteamientu, la nueva oficina va ufiertar un serviciu permanente de traducción, elaborando documentos públicos en asturiano, incentivando la colocación de carteles indicativos en llingua asturiana ya implicando na promoción llingüística a les entidaes públiques y privaes del conceyu. La oficina va abrir nun principiu tres díes a la selmana:miércoles, xueves y viernes n’horariu de mañanes. 31 de mayu, 2005 0 FacebookTwitterPinterestEmail
Sociedá El pasu del Plan de Normalización pela Xunta evidenció les sos contradicciones by asturnet 30 de mayu, 2005 El pasu del Plan de Normalización Social del Principáu pela Xunta Xeneral volvió poner en claro les contradiciones ente la puesta en marcha d’iniciatives normalizadores pal asturianu y el desamparu llegal nel que s’atopa la nuestra llingua ensin la so reconocencia oficial.Grupos parlamentarios y representantes de distintes entidaes comprometíes colos drechos llingüísticos espunxeron los sos estremaos puntos de vista, el más xeneralizáu ente los defensores de la supervivencia de la nuestra llingua foi la necesidá irrefugable d’algamar la oficialidá, tamién coincidieron n’alertar sobre’l futuru inciertu de la llingua asturiana énte la perda de falantes y l’ausencia de midíes efectives pa contrarrestar esta situación. La valoración nel parlamentu del Plan diseñáu pola Conseyería de Cultura convirtióse nun debate xeneral sobre el casu nel que ta la llingua asturiana, la única xunta l’aragonés qu’inda nun goza del so reconocimientu oficial. Más qu’enxuiciar les midíes propuestes nel Plan de Normalización, cásique tolos representantes d’entidaes comprometíes cola supervivencia del asturianu, aprovecharon les sos intervenciones pa resaltar lo que falta. Nun hubo un rechazu frontal a la iniciativa de Política Llingüística inda fueron más les voces que coincidieron en señalar qu’énte la situación real que vive la llingua asturiana les midíes propuestes alpenes van algamar eficacia en cuantes a la necesidá urxente d’adoptar polítiques actives de normalización social amparaes por un marcu llegal qu’implique dafechu a tolos poderes públicos d’Asturies y garantice los derechos sociales de los ciudadanos. El Plan de Normalización Social pa la llingua asturiana aprebáu va unes selmanes pol Gobiernu del Principáu pasó güei pela Comisión de Cultura de la Xunta Xeneral nuna sesión na que representantes d’instituciones como l’Academia de la Llingua, del movimientu cívicu como la Xunta Pola Defensa de la Llingua y el Conceyu Abiertu pola Oficialidá o entidaes como l’Observatoriu Llingüísticu, la Fundación Caveda y Nava o el Seminariu de Filoloxía Asturiana espresaron les sos opiniones estremaes respective a la normalización del asturianu y a la situación na que s’alcuentra la nuestra llingua. Los únicos puntos onde coincidieron los comparecientes foi na necesidá d’incluir la cooficialidá de la nuestra llingua nel Estatutu y n’alertar sobre la perda cada vez más evidente de falantes, dalgo que podía llevar a la despaición real de l’asturianu si nun se tomen midíes eficaces pa contrarrestalo. El Plan de Normalización de la Conseyería de Cultura ye “fondamente insatisfactoriu” pa la másima institución llingüística d’Asturies, l’Academia de la Llingua y talo señaló “nin siquier puede llamase propiamente de normalización, porque nun normaliza nada, en cualquier casu ye un plan que podía llamase de dignificación”, pa Cano “la normalización nun ye posible ensin la reconocencia de la oficialidá”. Encargóse de remembralo una vez más la propia presidenta de la institución, Ana Cano, na so comparecencia na Xunta Xeneral pa valorar la iniciativa aprebada nun va muncho pol Gobiernu del Principáu. Cano tuvo un xuiciu percríticu hacia’l Plan, espresáu nos mesmos términos nos que se vieno manifestando l’Academia dende la conocencia del testu onde s’articula la iniciativa de la Conseyería de Cultura y que la so presidenta recalcó nel so discursu institucional del Día les Lletres nel Teatru Campoamor. Pa la representante de la Xunta pola Defensa de la Llingua, Pilar Fernández, el Plan de Normalización Social ellaboráu pola Oficina de Política Llingüísticanun incide nel que consideró el principal problema sociollingüísticu d’Asturies: la perda de falantes. La representante de la Xunta recordó a los políticos que “tienen de xestionar el patrimoniu llingüísticu de la que pudiera ser la última xeneración de falantes d’asturianu” y pidió qu’exerceran la so “potestá pa construir un futuru meyor pa la llingua asturiana faciéndola oficial”. Pa la Xunta la non inxerción de la cooficialidá na inminente reforma del Estatutu diba ser “una gravísima irresponsabilidá” de los políticos, no que calificó de “medía definitiva y crucial pa la llingua asturiana”.Fernando Ornosa, voceru del Conceyu Abiertu pola Oficialidá espresóse en términos asemeyaos a la representante de la Xunta, pal que “el futuru de la nuestra llingua pasa por reconocer la oficialidá, una demanda cada vez más clara de la sociedá asturiana”. El más comprensivu col Plan de Cultura foi el profesor de la Universidá del País Vascu, Francisco Llera que valoró “positivamente” les midíes entamaes dende la Oficina de Política Llingüística y les “espectatives qu’abría”. El sociólogu caraviesu, qu’acudía en calidá de miembru del Observatoriu Llingüísticu a la Xunta Xeneral, coincidió sicasí colos otros comparecientes na necesidá de recoyer la oficialidá nel Estatutu, talo demanda una parte importante de la sociedá asturiana, según los estudios d’opinión entamaos pol propiu Llera Ramo. Xulio Viejo, del Seminariu de Filoloxía Asturiana, calificó el Plan de “bien concebíu pero mal definíu”. Pela tarde tocó-y defender el Plan de Normalización Social pa la llingua asturiana a la conseyera de Cultura, Ana Rosa Migoya, que compareció acompañada del responsable de Política Llingüística, Ramón d’Andrés y del conseyeru d’Educación José Luis Riopedre. La conseyera, que fexo parte de la so intervención n’asturianu, defendió les midíes entamaes pol gobiernu del Principáu como una iniciativa que calificó de “pasu importante pa sentar les bases d’un consensu necesariu alrodiu de la llingua asturiana, superando enzancos y engarradielles inútiles”. Paloma Uría, en representación del grupu parlamentariu d’IX-Bloque, apoyó el Plan, inda recalcó la necesidá de nun escaecese del reconocimientu de la oficialidá como midía fundamental p’afondar na normalización del asturianu. Per parte del Partíu Popular, el diputáu Joaquín Aréstegui calificó el Plan de Cultura de “oportunista” y “nada eficaz”, pal representante de la oposición: “ye un plan fechu namás pa llavase la cara énte los sos socios de coalición”.Tres la so aprebación definitiva pol Conseyu de Gobiernu del Principáu, yera esta la primer ocasión na que’l Plan se debatía nel parlamentu y cola opinión de distintos axentes sociales comprometíos cola defensa de los drechos llingüísticos asturianos. 30 de mayu, 2005 0 FacebookTwitterPinterestEmail
Sociedá A.I. denuncia nel so informe de 2005 que’l nuevu orde mundial nun cuenta colos derechos humanos by asturnet 26 de mayu, 2005 Los representantes d’Amnistía Internacional n’Asturies ufiertaron un panorama mundial que tocante a los derechos humanos nun invita a pensar que’l nuevu orde políticu tea favoreciendo una realidá acordies col respetu a la integridá de les persones y al desenvolvimientu de los pueblos. Na presentación n’Uviéu del Informe añal correspondiente a 2005, Pilar Lobo, portavoz d’Ammistía n’Asturies afirmó que Los gobiernos nun tán cumpliendo la so promesa d’establecer un orden mundial basáu nos derechos humanos, sinón que tán siguiendo una nueva y peligrosa axenda. Na presentación énte los medios del Informe Añal 2005 d’Amnistía Internacional, la organización afirmó que “los gobiernos nun dieran amueses d’ integridad nel exerciciu del so lideralgu y tienen rendir cuentes”. Pa Amninstía Internacional anguaño “ta elaborándose una nueva axenda na que s’utiliza el llinguaxe de la llibertá y la xusticia p’aplicar polítiques de mieu ya inseguridá”. Con tal fin, según la organización humanitaria ta intentándose, ente otras cosas, “redefinir la tortura pa facela admisible, manifestó Pilar Lobo Fernández, vicepresidenta de la Unidad Territorial de Amnistía Internacional en Asturias. Esta nueva “axenda, sumada a la indiferencia y la inacción de la comunidá internacional”, afirmó Lobo, “dexó a incontables millares de persones abandonaes a la so suerte en crisis humanitaries y conflictos olvidaos” a lo llargo de 2004. La representante d’Aministía Internacional n’Asturies enumeró los casos más graves vivíos nel pasáu añu. Asina, l’informe de la organización humanitaria remembra qu’en Darfur, el gobiernu sudanés “provocó una catástrofe de derechos humanos, y la comunidá internacional fizo mui poco p’abordar la crisis y abondo tarde, defraudando asina a centenares de miles de persones. La situación d’Haití, ye otra d’eses catástrofes humanitaries onde “se permitió ocupar de nuevu posiciones de poder a individuos responsables de graves violaciones de derechos humanos. Tamién nel este de la República Democrática del Congo, según Amnistía Internacional “nun hubo una respuesta efectiva a la violación sistemática de decenes de miles de muyeres, neñes y neños, incluíos bebés”. Afganistán, foi otru de los escenarios denunciaos pola organización humanitaria, onde “al pesar de celebrase elecciones, Afganistán precipitóse nuna espiral de desorden ya inestabilidad” y en Irak, “la violencia yera endémica en 2004”, afirma l’informe. Nel planu nacional, los gobiernos, según Amnistía “traicionaron los derechos humanos con un coste terrible pa los ciudadanos d’a pie”, asina, según informes en poder de la organización, “los soldados rusos torturaron, violaron y agredieron sexualmente a muyeres chechenes con impunidá”;el gobiernu de Zimbabue “manipuló la escasera d’alimentos con fines políticos”. Pa Amnistía, la traición de los gobiernos a los derechos humanos tuvo acompañada d’actos cada vez más terribles de terrorismu, “al llegar los grupos armaos a un grado inaudito de brutalidá”. La decapitación televisada de cautivos n’Irak; el secuestru de más de milenta persones, incluíos centenares de neños, nuna escuela de Beslan, y la matanza de centenares de viaxeros de trenes de cercaníes de Madrid, sescudieron al mundu, manifestó Pilar Lobo. Sicasí”, pa la representante d’A.I. n’Asturies, los gobiernos “nun tán abordando la so falta d’ésitu na llucha contra el terrorismu, sinón qu’insisten n’aplicar estratexes fallíes pero convenientes dende el puntu vista políticu”. A.I. considera que, cuatro años después del 11-S, “la promesa de facer del mundu un sitiu más seguru sigue ensin cumplise. La política de los Estos Uníos en materia de seguridá tampoco escapa a les denuncies de la organización humanitaria pa la que “los intentos del gobiernu estadounidense de suavizar la prohibición absoluta de la tortura por mediu de nueves polítiques y de terminoloxía cuasi administrativa como manipulación medioambiental, postures estresantes y manipulación sensorial, fueron ún de los ataques más perxudiciales a los valores globales. Pa Aministía Internacional “la duplicidá de los gobiernos y la brutalidá de los grupos armaos alcuentren cada vez más oposición, en forma de decisiones xudiciales, resistencia popular, presión pública ya iniciatives de reforma de la ONU señaló Pilar Lobo, pa la que agora el reto que se plantea al movimientu de derechos humanos consiste n’aprovechar la potencia de la sociedá civil pa obligar a los gobiernos a cumplir les promeses que ficieran en materia de derechos humanos. 26 de mayu, 2005 0 FacebookTwitterPinterestEmail
Sociedá L’Academia amúesase contenta del acoyimientu que ta recibiendo la so propuesta de pautu social pola llingua y la cultura asturianes by asturnet 24 de mayu, 2005 L’Academia de la Llingua Asturiana emitió ayer un comunicáu nel que manifiesta’l so contentu pola acoyida que ta algamando la so propuesta d’entamar un gran pautu pola llingua y la cultura d’Asturies. La propuesta féxola pública la presidenta de la institución nel so discursu institucional del Día les Lletres y inclúi un alcuerdu alrodiu de la oficialidá, la normalización de la llingua y l’inxerimientu de la cultura asturiana en toles estayes de la enseñanza y de la vida social de la nuestra comunidá. Sindicatos y partíos asturianistes tan acoyendo la propuesta de l’Academia con bon tiez, según fizo saber la institución. Hasta agora el másimu organismu en materia llingüística del Principáu caltuvo reuniones coles organizaciones sindicales UXT, Comisiones Obreres, USO, SUATEA y Corriente Sindical d’Izquierda, asina como cola mayoría de los grupos políticos nacionalistes y asturianistes, amás d’organizaciones sociales implicaes na defensa de los drechos llingüísticos. Na valoración que fai l’Academia d’estos alcuentros amúesase contenta. Agora l’espardimientu de la so propuesta va tener una segunda fase a lo llargo de la primer quincena de xunetu col treslláu de los conteníos de la ufierta de pautu al gobiernu autonómicu, al central, a la Xunta Xeneral del Principáu y a los grupos parlamentariod presentes nella. La propuesta scadémica nomada Alcuerdu Social y Políticu sobre la Llingua y la Cultura dAsturies, resúmese nos siguientes puntos:reconocimientu del asturianu como llingua co-oficial nel Estatutu dAutonomía dAsturies; afitamientu de los conteníos de la normalización y plazos na so puesta en práutica; pautu presupuestariu, conseñandol mínimu necesariu pa facer vidable y efeutivu lusu social de la llingua;dignificación, recuperación y divulgación de la cultura asturiana (arte, folklore, etnografía, historia, música ) nel ámbitu educativu; inxerimientu de lAntropoloxía Cultural Asturiana, nel nivel que correspuenda, dientro de la Universidá dUviéu. Na nota de prensa emitía ayer l’Academia de la Llingua afima que ta enfotada en “que les perbones perspeutives quhasta esti momentu sacolumbren puedan confirmase coles xuntes que van caltenese nes próximes selmanes y que, en definitiva, lalcuerdu pueda ser una realidá a mediu plazu” y anuncia que la institución dirá informando públicamente de les novedaes que se vayan produciendo a lo llargo del procesu d’espardimientu de la so propuesta. 24 de mayu, 2005 0 FacebookTwitterPinterestEmail
Sociedá Simone Veil algama’l Premiu Príncipe d’Asturies de Cooperación Internacional by asturnet 24 de mayu, 2005 El xuráu del Premiu Príncipe d’Asturies de Cooperación Internacional fexo pública esti meudía la decisión d’apurrir el galardón a la francesa Simone Veil. La premiada ye un referente moral na Europa contemporánea de la llucha polos derechos humanos y contra la intolerancia. Superviviente del campu d’esterminiu d’Auschwitz y presidenta del primer parlamentu européu, tien destacao al empar por trabayar en pos de la unidá comunitaria. Anguaño ye presidenta de la Fundación pa la Memoria de la Shoah (Holocausto), una institución dedicada a remembrar a les víctimes del nazismu. El xuráu del Premiu Príncipe d’Asturies de Cooperación Internacional tuvo presidíu pol ex presidente español Leopoldo Calvo Sotelo, y formébenlu la presidenta de la Xunta Xeneral del Principáu María Jesús Álvarez González, Enrique Barón, Emilio Cassinello, Alicia Castro Masaveu, Manuel Díaz Ron, Severino García Vigón, Antonio Garrigues Walker, Laura González, Álex Grijelmo, Luis Lada Díaz, Ricardo Martí Fluxá, José María Martín Patino, Marcelino Oreja Aguirre, Yago Pico de Coaña, Francisco Pinto Balsemão, Luis Ruiz de Gopegui, Alfonso de Salas, Luis Sánchez-Merlo, Nicolás Sartorius, Gustavo Suárez Pertierra y Teodoro López-Cuesta, como secretariu. La premiada Simone Veil nació na ciudá francesa de Niza en 1927. En 1944,na ocupación de Francia polos alemanes, deportáronla con so madre y una hermana, al campu de concentración d’Auschwitz. So padre y otru hermanu desapaecieron y nunca más volvió a sabese d’ellos. Una vez lliberada, en mayu de 1945, instalóse en París, onde se llicenció en Derechu y diplomóse nel Institutu d’Estudios Políticos. Veil ingresó en 1957 por oposición na Macistratura como agregada del Ministeriu de Xusticia. En 1969 pasó a desempeñar el cargu de conseyera técnica del mesmu Ministeriu y ente 1970 y 1974 fue secretaria xeneral del Conseyu Superior de la Maxistratura. Mientres el mandatu presidencial de Valery Giscard d’Estaing, en 1974, convirtióse na primera muyer ministra de la Quinta República al facese cargu del Ministeriu de Sanidá y Seguridá Social, cartera qu’ocupó cinco años, nos que modernizó la organización hospitalaria de Francia. Nes elecciones al Parlamentu Européu de 1979 encabezó la llista de la Unión pa la Democracia Francesa y fue nombada presidenta del primer Parlamento Europeo elexíu por sufraxu universal directu, un cargu qu’ ocupó hasta febreru de 1982, en que pasó a desempeñar la presidencia de la Comisión Xurídica del mesmu Parlamentu. Nos comicios europeos de 1984 encabezó la llista lliberal-conservadora y convirtióse en presidenta del grupu lliberal. En 1989, salió escoyía eurodiputada por “Centru pa Europa” y formó parte de la Comisión d’Asuntos Políticos del Parlamentu. En 1993, tres el triunfu electoral d’Edouard Balladur, fue nomada ministra d’Estáu d’Asuntos Sociales, Sanidá y Ciudadanía, cargu qu’ocupó hasta 1995. Ye, dende 1998, miembru del Conseyu Constitucional de Francia y, dende 2001 presidenta de la Fundación pa la Memoria de la Shoah (Holocaustu). 24 de mayu, 2005 0 FacebookTwitterPinterestEmail
Sociedá Ana Cano sigue al frente de l’Academia by asturnet 24 de mayu, 2005 Ana Cano como presidente y Miguel Ramos Corrada como vicepresidente, foron escoyíos esta selmana xunta Roberto González-Quevedo como secretariu, Urbano Rodríguez como vicesecretariu y Carlos Lastra como ayalgueru pa formar la Xunta de Gobiernu de l’Academia de la Llingua Asturiana, repitiendo la direición que venía calteniéndose hasta agora. Les eleiciones na institución académica desendolcáronse con normalidá dafechu, afitándose la continuidá de la direición caltenida hasta agora, xustamente nel momentu que l’Academia tien plantegada una propuesta d’entamar un gran pautu pola llingua y la cultura d’Asturies. La propuesta féxola pública la presidenta de la institución nel so discursu institucional del Día les Lletres y inclúi un alcuerdu alrodiu de la oficialidá, la normalización de la llingua y l’inxerimientu de la cultura asturiana en toles estayes de la enseñanza y de la vida social de la nuestra comunidá. 24 de mayu, 2005 0 FacebookTwitterPinterestEmail