Portada Educación Yoleo Club ye la comunidá de mozos llectores que más xorrez n’España

Yoleo Club ye la comunidá de mozos llectores que más xorrez n’España

by redacción asturnews

Yoleo Club ye la comunidá de mozos llectores que más xorrez n’España y vieno acabante d’esparder entá más unes actividaes empobinaes a llograr que los neños nun dexen de lleer enantes de los 15 años.

El 50% de los neños que lleen davezu a los 10 años dexen de faelo antes de los 15. Jesús Hernán, cofundador y director de Yoleo Club, esplica’l raigañu del problema: “A partir de los 10-12 años, el nuesu mundu interior tresfórmase radicalmente y la llectura dexa de ser daqué apetecedora. Nun ayuda pa nada l’usu indecente de la tecnoloxía social, pero tampoco la cultura de llectura heredada de modelos d’enseñanza que nun tienen en cuenta’l papel central del alumnu nel so procesu d’aprendizaxe”.

Espertos como Hernán inciden nel fechu de tratar la llectura dende la pasión y el vezu, más allá de la so dimensión académica. Una misión complexa, cuidao que nun resulta senciellu atopar víes pa promover el gustu pola llectura ente los mozos.

En Yoleo Club consideren la llibertá y la contemporaneidá aspeutos clave pa consiguir esti retu, combinando la ufierta llectora, la redolada dixital, la gamificación y l’impactu. Al respective de la tecnoloxía, Hernán apunta que se trata d’afaese a les circunstancies y d’aprovechar los sos mayores beneficios, faer que la llectura nun sía un casu aparte”.

Nancie Atwell, una de les maestres más influyentes del mundu y ganadora del Global Teacher Prize en 2015, basa’l so métodu na llibertá del neñu pa escoyer los llibros que quier lleer y na orientación per parte de los sos educadores. Xera que tienen bien en cuenta en Yoleo Club, cuidao que trabayen con un catálogu de casi 700 propuestes de llectura y especialistes qu’emponen a los mozos na so selección.

En Yoleo Club aseguren que los mozos busquen nuevos referentes, porque crecen nun universu qu’integra cada vez más conteníos y actores. “Una bona hestoria puede escondese nuna aventura de llectura interactiva creada con un emulador de Whatsapp o tres un poema visual en Instagram”, afirma Hernán. Por ello, esta comunidá educativa confía ciegamente nes dinámiques de xuegu como poderosa ferramienta d’aprendizaxe, por aciu, por casu, aplicaciones educatives pal móvil.

La interacción ye la base de Yoleo Club. L’educador, gracies a la buelga dixital, puede dir viendo cómo les llectures avancen o los miembros de la comunidá encamiéntense llectures unos a otros, a partir d’un métodu fiable, qu’apurre información en tiempu real. Cualquier desorientación ye visible y constitúi una alerta a la que reaccionar a tiempu.

Amás, el mentoring humanu ye un elementu clave nel desenvolvimientu d’esti modelu d’aprendizaxe conectáu. Si l’adultu participa de lo positivo de la realidá dixital, puede emponer al nuevu y ayudar a convertir n’actividá positiva la tarrecida pasividá, cola que munchos connotan l’usu de les tecnoloxíes.

El nuevu enfoque que plataformes como Yoleo Club tán dando a la llectura oblíganos a cavilgar sobre lo que se ta faciendo nel ámbitu educativu, familiar y públicu y escontra ónde queremos llegar. “En Yoleo Club queremos que los nuevos re/incorporen la llectura a la so día ente día como actividá d’esfrute personal y social. Sería un gran ésitu qu’asina fora, la llectura son les blimes d’una sociedá meyor, más crítica, autónoma y feliz”, conclúi Jesús Hernán.

Tamién te podria gustar