Xuan Xosé Sánchez Vicente presenta’l so poemariu últimu n’Uviéu y Xixón

Depués de presentar esti llunes, día 11 de xineru De les hores y les memories, nel Salón d’Actos de la Fundación CaxAstur Liberbank d’Uviéu, Xuan Xosé Sánchez Vicente va facer lo propio esti xueves 14 na Llibrería La Buena Lletra de Xixón.

La presentación del poemariu en Xixón va esti el día  14 na llibrería La Buena Letra, na cai Casimiro Velasco, 12 a les 8 la tarde, y nes dos presentaciones ta prevista la llectura de poemes pol autor. Na primer presentación, n’Uviéu, abellugaron al autor l’editor Antón garcía y la poeta esther Prieto, d’Ediciones Trabe.

Ye “una poesía del sosiegu y de la serenidá que da l’aceptación de la vida y de la muerte” porque “en poemes de corte clásicu que s’allarguen como l’alcordanza, va esgranando Sánchez Vicente los grandes temes de la lliteratura universal, el pasu del tiempu, el amor y la muerte, con versos trescalaos de serena señardá polo perdío y de referencies lliteraries al tiempu que la naturaleza va, a poco y a poco, ganando protagonismu”. Había más d’una década que Xuan Xosé Sánchez Vicente nun publicara un llibru de poesía y por eso ye enforma bien recibía l’apaición d’esta “obra de madurez”, como la noma la Editorial Trabe, na que l’autor algama gran altor llíricu y na que’l yo poéticu s’amuesa rescamplante.

Xuan Xosé Sánchez Vicente (Xixón, 1949) ye un nome imprescindible de les lletres asturianes: poeta, narrador, dramaturgu y articulista agudu y reflexivu, la so obra, bayurosa y variada, empobina yá’l camín de los clásicos. Asina los sos poemarios Camín de señardaes (1980), Poemes de Xixón (1981), De reidores costes (1988), …Y de llastientes picos (1999) y As de corazones (2001).