Xixón xuntase a la carta internacional de datos abiertos

Como amuesa del compromisu de Xixón colos datos abiertos y n’ares de fomentar la tresparencia, participación ciudadana, el serviciu y la eficiencia, el Conceyu de Xixón vieno acabante firmar la Carta Internacional de Datos Abiertos a iniciativa del Serviciu de Comunicación y Nuevos Proyectos.La Carta Internacional de Datos Abiertos surdió nel añu 2015 na Conferencia Internacional de Ottawa onde los espertos ellí aconceyaos detectaron la necesidá de crear un manifiestu sobre datos abiertos qu’estableza los 6 principios que tienen de rexir la información publicada.

Los principios alcordaos pela Carta Internacional de Datos Abiertos” son que los datos publicaos han ser abiertos por defectu temporalizables y globales, accesibles y reutilizables, comparables y interoperativos, destinaos a la meyora del gobiernu y de la participación ciudadana y empobinaos al desenvolvimientu inclusivu y a la innovación.

A lo llargo de l’añalidá 2016, numberosos gobiernos nacionales y locales y otres instituciones adoptaron y sofitaron la Carta Internacional de Datos Abiertos y anguaño cunta con 46 firmantes (16 gobiernos nacionales y 24 locales/rexonales ente los que s’atopen Zaragoza, Salamanca y Madrid) y 33 organizaciones y empreses que la sofiten.

Cola adhesión a esta carta, el Conceyu de Xixón ratifica la implicación y el sofitu políticu a los principios fundamentales de tresparencia y comprométese a contribuyir cola so esperiencia a esta iniciativa según promover los principios de la mesma dientro de la estratexa de Gobiernu Abiertu na ciudá.
Más información en: http://opendatacharter.net/