Xixón recibe la segunda edición del Salón Internacional de les Sidres de Gala

Esta selmana, los díes 26 y 27 d’ochobre, tendrá llugar nel Hotel Avant Garde de Xixón el II Salón Internacional de les Sidres de Gala. Una oportunidá única pa prebar sidres de tol mundu que nun son d’escanciar: axampanaes, esplumoses, brut, de nuea espresión, auguardiente o de xelu y que tien el cumal de las programación el día 26 cola celebración de la Cena de Gala, y el 27 cola Tastia Abierta.

La nueche del vienres 26, a les 21 hores celebraráse la Cena Gala ellaborada pol prestixosu xef asturianu Javier Loya (estrella Michelín), na que cada platu dirá maridáu con dos sidres estremaes. En cada casu desplicaránse les sos principales carauterístiques organoléptiques.

Según la organización esta va ser una ocasión única pa prebar la sidre d’una mena estremada a l’avezada que mos permite conocer les carauterístiques más importantes de les sidres y comprobar la so fusión coles propuestes gastronómiques que fadrá’l xef, Javier Loya, que tien la Cena enagora pendiente d’ellaboración en función de les sidres que seyan escoyíes pal maridaxe.

La Cena de Gala va ser una propuesta gastronómica especialmente interesante darréu que ca platu dirá maridáu con dos variedaes de sidre estremao, de les que nel intre de ser servíes dirá desplicándose les sos principales carauterístiques.

El sábadu 27 tendrá llugar una tastia abierta al públicu con tola sidre participante nesti II Salón Internacional de les Sidres de Gala, procedentes d’una docena países. Tamién se rializarán tasties guiaes de dalgunes d’elles. L’horariu sedrá de 11 a 15 hores pa profesionales del seutor y de 17 a 21 hores pal públicu en xeneral. El preciu ye nel casu la Tastia de 5 € y el de la Cena de Gala ye de 50 € y el númberu places restrinxíu.

Páxina web del Certame