Portada Conceyos Xeitu celebra’l so XV aniversariu con un conciertu gratuitu nel Filarmónica

Xeitu celebra’l so XV aniversariu con un conciertu gratuitu nel Filarmónica

by redacción asturnews

El grupu de baille tradicional Xeitu celebra’l so XV aniversariu con un conciertu gratuitu, esti sábadu día 23, nel Teatru Filarmónica d’Uviéu. Xeitu ye unu de los grupos del programa municipal ‘Folclore na cai’, que va clausurar esta edición esti próximu domingu con una actuación de más d’una docena de formaciones, a les 13 hores, na plaza del Conceyu.

El conceyal de Cultura, José Luis Costillas, presentó esta selmana, en dependencies municipales, el conciertu gratuitu que’l grupu Xeitu va ufiertar esti sábadu, día 23, nel Teatru Filarmónica, a les 20 hores y col que la formación va celebrar la so 15 Aniversariu.  Xuntu al conceyal comparecieron el directores de la formación, Paulino Santirso y María Vázquez y pandereteres del grupu, qu’adelantraron una de les pieces del recital.

El presidente de la Fundación Municipal de Cultura felicitó al grupu “pol vuesu trabayu y en concretu a los directores de la formación, Paulino y a María por apostar polo nueso, pol nuesu folclore, por ser garantes de la tradición musical de la nuesa tierra, d’Asturies, y tamién pol vuesu llabor de recuperación de pieces y de indumentaria. Sois una de les formaciones de baille tradicional más numberoses de la rexón y prueba de la vuesa bona salú ye’l númberu d’integrantes mozos que conformen el grupu. Dende’l Conceyu d’Uviéu quiero destacar el nuesu apueste decidíu pola defensa del nuesu folclore, de la tradición musical de los nuesos ancestros, como asina s’evidencia nel nuesu programa de Folclore na cai, nel que participáis dende fai yá dellos años, y que tantu ésitu tien. Ello ye que esti próximu domingu va cerrase, na plaza del Conceyu, con una multitudinaria actuación na que van tar presentes más d’una docena de grupos y bandes qu’actuaron mientres esta edición.  Dende la mio área, dende Cultura, anímovos a siguir rescatando’l soníu de la nuesa tierra, los raigaños qu’entá caltienen los nuesos mayores, esos informantes anónimos a los que, ensin dulda, tamién hai que reconocer la so aportación a la nuesa Cultura”.

Paulino Santirso, aseguró que “el 15 aniversariu del grupu animónos a editar un discu y a presentalu, esti sábadu, en conciertu nel Filarmónica, siempres dende’l máximu respetu a la tradición. Sobro l’escenariu, va haber 35 persones que van percorrer cola so música y el so baille toa Asturies. Táis toos invitaos”. Y María Vázquez  destacó la collaboración “de dos de los meyores investigadores que tien la rexón, Xosé Antón Ambás y Ramsés Ilesies, que siguen viviegamente recuperando cantares y dalgunos d’ellos inéditos tán nesti discu. Escoyimos repertoriu de dalgunos de los grandes informantes, tanto homes como muyeres, que tuvieron venceyaos a Xeitu. Xente anónimo que por aciu la trasmisión oral dexáronnos un patrimoniu que tenemos qu’afigurar por que perdure nel tiempu. Dalgunes d’estes persones tan importantes pa Xeitu como pa la cultura asturiana yá falten, asina que tamién ye xuna manera de rindi-yos el nuesu pequenu homenaxe n’agradecimientu a eses ayalgues en forma de melodía que nos dexaron”.

Tamién te podria gustar