Vicente Gotor atéchase na “non oficialidá” pa nun pronunciase nel claustru sobre’l “maior” pa Filoloxía

Vicente Gotor atechóse esti llunes na “non oficialidá” pa nun pronunciase sobre’l “maior” pa Filoloxía na xunta del claustru universitariu cellebráu esti llunes cuando un miembru de la organización Fai!, presente nesti órganu académicu, instó al Rector de la Universidá d’Uviéu a “cumplir la so pallabra, no que cinca a la defensa de la filoloxía asturiana, y sofitar un marcu dignu y non discriminatoriu pa los estudios del idioma d’Asturies na universidá asturiana, asina como a entamar otres midíes que faigan posible la visibilización esterna del idioma na imaxe corporativa y l’usu alministrativu y científicu del asturianu ensin torga nenguna”.

La rempuesta de Vicente Gotor centróse na defensa de la propuesta del decanu de transición de Filoloxía, que defiende un tratu d’escepción y claramente discriminatoriu frente al restu de los estudios impartíos na facultá, proponiendo un MINOR que yá foi calificáu por Fai! nel informe “Filoloxía Asturiana y Espaciu Européu d’Educación Superior” como “vergonzante, triste ya indignante, al condenar a la llingua asturiana a una carga de 48 crÉItos ECTS como máximo, carga a toes lluces insuficiente pa formar profesionales mínimamente competentes nel estudiu del idioma, y que ye incluso inferior a la carga llectiva actual col títulu d’especialista”.

Amás, sorpresivamente pal coleutivu estudiantil, el Rector aludió a la “non oficialidá” de la llingua asturiana “pa negar el so apoyu a un rangu superior pa los estudios de filoloxía que’l del MINOR, porque seguramente nun sedríen aceptaos en Madrid pola ANECA, responsable de les nueves titulaciones al ser esta una llingua non oficial”.

Según Fai!, Vicente Gotor “paez escaecer que dende hai bien d’años tanto la propia Universidá d’Uviéu como’l parlamentu asturianu aprobaron nel añu 1996 por unanimidá la creación d’esta titulación, con una demanda social importantísima ya innegable regulada na Llei d’Usu, a la que-y hai que dar unes soluciones afechisques”.

Esta aparente falta d’interés “contrasta coles sos declaraciones, tres de la crisis xenerada na facultá de filoloxía, col vetu y espulsión de los estudios de llingua asturiana, onde aseguró acertada y públicamente que defendería un marcu dignu y non discriminatoriu coles demás llingües impartíes na universidá asturiana”.

Per último, nun comunicáu asoleyáu tres del claustru, dende Fai! vuelvese “a instar al Rector a que s’involucre y cumpla los sos compromisos pre y post-electorales y acabe d’una vegada por toes cola situación d’indefensión y arrequexu na que s’encuentra l’idioma d’Asturies na nuestra universidá, buscando una solución que concilie, ensin reserves nin pasos atrás, les necesidaes d’una formación apropiada nesti campu que demanden les propies lleis asturianes, asina como la non discriminación frente al restu de llingües, poniendo a la llingua asturiana al mesmu nivel que cualquier otru estudiu de filoloxía n’Asturies”.

Informe “Filoloxía Asturiana y Espaciu Européu d’Educación Superior”