Vázquez conviértese nel primer rector reelixíu de la democracia reciente

El caderalgu d’Economía Juan Vázquez siguirá siendo’l rector de la Universidá d’Uviéu hasta 2008, depués de derrotar nes urnes por sólo 152 votos al so únicu oponente, Vicente Gotor, nos primeros comicios universitarios abiertos a estudiantes y personal llaboral non docente de la institución académica asturiana. Vázquez conviértese asina nel primer rector asturianu de la democracia reciente que resulta reelixíu nel cargu depués del so primer mandatu.

Los resultaos de la votación foron enforma más reñíos de lo que marcaben les previsiones: Vázquez recibió’l 51,2 por cientu de los votos ponderaos, frente al 48,7 por cientu qu’axuntó el caderalgu de Química Vicente Gotor, vencedor ente’l personal alministrativu y de servicios.

Pol contrariu, foi l’apoyu mayoritariu de la comunidá estrictamente académica -profesores y alumnos- el qu’acabó por entornar la balanza del llau del agora reelixíu rector de la Universidá d’Uviéu, qu’afronta como retu cimeru l’adecuación de les titulaciones superiores al nuevu sistema européu d’enseñanza superior, d’equí a 2010.

El triunfu electoral permitirá-y amás a Juan Vázquez -enfotáu en gobernar “pa toos”, según precisó acabante ser reelixíu- siguir al frente de la Conferencia de Rectores de les Universidaes Españoles y continuar exerciendo la presidencia de la Conferencia Iberoamericana Universitaria.