Va haber tres películes más del universu Harry Potter

El mundu máxicu de Harry Potter torna a la gran pantalla con Animales fantásticos y ónde atopalos. Esta nueva entrega va ser l’entamu d’una saga que va cuntar con otros dos películes, según aseguró J. K. Rowling.

L’autora de la saga lliteraria reveló lo que yera un secretu a voces: Animales fantásticos va ser una triloxía. Hasta agora nun hubiera confirmación oficial, anque munchos rumores apuntaben qu’a la película protagonizada por Eddie Redmayne —ganador del Oscar con La teoría de too y candidatu con La moza danesa— siguiríen-y otros dos títulos más.

Rowling, al traviés de la so cuenta de Twitter, contestó a una siguidora qu’aseguraba que la obra de teatru Harry Potter and the Cursed Child sería una película. “Tarrezo qu’escuchasti mal. Cursed Child ye una obra de teatru. Sicasí, Animales fantásticos van ser tres películes”, corrixó la escritora.

Con Redmayne a la cabeza del repartu, Warner espera qu’esta triloxía sía igual de codalosa que la franquicia protagonizada por Daniel Radcliffe, Emma Watson y Rupert Grint, que ye la más taquillera de la hestoria, con una recaldación de más de 7.000 millones d’euros en tol mundu.
Criatures mitolóxiques

El director de los cuatro últimes películes de Harry Potter, David Yates, va dirixir esti filme a partir d’un guion robláu por J. K. Rowling, nel que ye’l primer trabayu de la escritora como guionista. Rowling tamién va trabayar como productora col sofitu de David Heyman, Steve Kloves y Lionel Wigram.

Animales fantásticos y ónde atopalos ye una precuela de Harry Potter. Al pie de Redmayne tamién van apaecer Jon Voight, Ron Perlman, Colin Farrell y Katherine Waterson. Esti spin-off tien afitada la so fecha d’estrenu pal 18 de noviembre de 2016. Tratase d’una obra qu’amplía l’universu de Harry Potter, rellatando la hestoria de Scamander, un viaxeru espertu nel estudiu d’ensame de criatures máxiques, llabor que lu va llevar a escribir el llibru de testu qu’apaez en Harry Potter y la piedra filosofal). Munchos d’estos animales mitolóxicos apaecieron a lo llargo de la saga de Harry Potter, y el compendiu de Scamander yera unu de los llibros de testu que Harry, Ron y Hermione utilizaben nes sos clases de Hogwarts.