Uviéu xúnese al llamamientu a families del programa Vacaciones en Paz, p’acoyer a neños y neñes saharagüis

La conceyala de Cooperación y d’Atención a les Persones, Marisa Ponga, presentó esta selmana, en rueda de prensa, el programa Vacaciones en Paz d’acoyida temporal de neños y neñes ente los 9 y los 12 años de los campamentos saharagüis de Tinduf (Arxelia), mientres los meses de xunetu y agostu.

La conceyala tuvo acompañada de Paula Bernardo García, miembru de la directiva y responsable del programa Vacaciones en paz n’Uviéu; Yahya Dgil, representante del  Frente Polisariu; y Gimena Llamedo González, directora de l’Axencia Asturiana de Cooperación al Desenvolvimientu.

Ponga incidió nel llamamientu a les families uvieines pa consiguir que neños y neñes de los campamentos saharagüis “puedan pasar un branu alloñaos de temperatures estremes y conozan la nuesa redolada y la nuesa cultura, aprender el nuesu idioma y sobremanera, tener unes condiciones de vida meyores y ameyorar la so salú”.

El programa Vacaciones en Paz, puntualizó Gimena Llamedo, dexó dende 2006, añu nel que se punxo en marcha, que “más de 2.500 neños y neñes de los campamentos visitaren Asturies”. “Ye una oportunidá pa conocer la realidá d’estos neños y neñes, sobremanera pa los más pequenos (…) la sociedá asturiana ye solidaria nel so conxuntu. Ser colos refuxaos sirios pero tamién tenemos qu’alcordanos de los saharagüis, que son los nuesos refuxaos”.

Paula Bernardo, esplicó qu’el so oxetivu ye poder traer a los cerca de 260 menores que vinieron a Asturies n’años anteriores “por eso precisamos que 40 families más s’embarquen nesti viaxe”. Pa formar parte del programa, indicó, lo comenenciudos pueden llamar a dos teléfonos: 622890713 ó 667708795 o bien escribir al mail vacacionesenpazasturiashotmail.com “Nun podemos ayudar a les 200.000 persones que viven nos campamentos pero sí podemos ayudar a neños y neñes”, concluyó.

Yahya Dgil indicó qu’esti programa “fai posible que los neños y neñes puedan pasar un branu normal’ nun vivir a más de 50 graos o ensin agua potable”.