Uviéu ufierta al Principáu una parcela pa un colexu d’educación especial

La conceyala de Patrimoniu, Cristina Pontón, visitó esta mañana del llunes la parcela que’l Conceyu ufiertó gratuitamente al Principáu pala construcción d’un colexu d’educación especial que sustituya al de Latores. La parcela, de titularidá municipal, allúgase nel barriu de Montecerrao y tien una estensión de 14.736,38 metros cuadraos.

L’actual colexu públicu d’educación especial d’Uviéu, asitiáu en Latores, “presenta graves faltes y defectos en materia de barreres arquitectóniques y adaptabilidá a les necesidaes de tolos alumnos, amás d’una grave masificación. Estes instalaciones, que se diseñaron para un máximu de 80 alumnos, son utilizaes güei por más de 170 neños y nuevos”, indicó la edil y miembros de l’Asociación de Padres y Madres del centru.

La parcela de Montecerrao axunta, a xuiciu de Pontón, “les  condiciones necesaries para allugar un centru educativu, amás del gran tamañu de la parcela que dexaría agospiar una infraestructura capaz de cubrir les necesidaes que tienen los alumnos. La parcela ta allugada ente les cais La Ribera, Ayer y Celestino Álvarez, polo qu’allugamientu en Montecerrao, dexaría que los alumnos pudieren realizar actividaes nel barriu que-yos dexaren ganar autonomía”.

A la edil acompañaranla miembros de l’Asociación de Madres y Padres, que tán esperando que la Conseyería apruebe esi terrén y que la solución llegue darréu. En cuantu al plazu d’execución, a partir de l’aprobación del terrén per parte del Principáu, sería necesariu mínimu un cursu más pa la construcción de les instalaciones.