Uviéu refuerza’l sofitu al comerciu con decenes d’actividaes esta Navidá

Concursos, campañes, sorteos, actividaes infantiles o’l Mercadín son dalgunes de les actividaes puestes en marcha dende la conceyalía d’Economía pa incentivar les compres nel comerciu d’Uviéu.

El conceyal d’Economía, Comerciu y Empléu, Javier Cuesta presentó esta selmana eses actividaes que “en materia de comerciu punximos en marcha en collaboración coles asociaciones de comerciantes, amás de les que van faer estes entidaes en collaboración con CaixaBank, n’una dómina tan importante pal comerciu, una dómina de compra pa cerrar un añu complexu y enfrentase a otru que vien llenu d’incertidumes”

Ente les actividaes promovidas en materia de comerciu pol Conceyu, indicó’l conceyal, “tán les de calter recurrente como’l Mercadín navidiegu na exa comercial del Antiguu pa dinamizar les compres nesta zona y qu’irradie actividá al restu de la ciudá; la dinamización de les cais con actividaes pa neños, coros… ambiente navidiegu que fai que la xente allegue a les exes comerciales; Tamién tenemos el Concursu de llume navidiego con dos categoríes, pa negocios y pa comunidaes de vecinos, con un total de 20.000 euros en premios. Este ye’l tercer añu que faemos el concursu y la calidá n’años previos foi bien relevante. Nesta ocasión quixímos incluyir un componente como ye la eficiencia enerxética y sostenibilidá, daqué que va tener en cuenta’l xuráu”.

A lo último, sorrayó Cuesta, “ta la campaña de promoción qu’arrincó esta ponte del comerciu d’Uviéu en dos ámbitos, una parte destinada los veceros locales -sol epígrafe Esta Navidá merca en casa- y un segundu ámbitu, desenvueltu a nivel rexonal con un spot televisivu treslladando qu’Uviéu ye la capital de la compra y el comerciu n’Asturies pal públicu procedente del restu de conceyos”

Ignacio Blanco Canga, presidente de la Federación Asturiana de Comerciu (FAC), destacó “el llabor del Conceyu a la hora apurrir llume y sofitanos con estes actividaes qu’agora presentamos… Nós convocamos la XIX edición del Concursu de escaparate Uviéu Tiendas-centru urbanu, un certame nel que la xente pon muncha ilusión y ye daqué yá consolidáu nes navidaes d’Uviéu. El plazu remata’l xueves próximu a les 14 hores, con inscripción abierta y gratuita a tolos establecimientos d’Uviéu”. Como novedá anguaño, puntualizó Blanco, “vamos incorporar l’I Concursu navidiegu d’imaxes comerciales pa tolos públicos. Queremos que cada persona que-y guste’l comerciu y l’arte presenten la imaxe qu’ellos quieran afigurar pa implicar entá más a los veceros. Los premios en vales regalo pa compres. Esperemos que tou sala bien y haya participación. Gracies a los comerciantes d’Uviéu”.

Sandra Sutil, presidenta de l’Asociación de Comercio Uviéu Antiguu (ACOA), anunció l’allugamientu un añu más l’allugamientu del árbol de los suaños n’El Fontán, con 4.000 suaños colgaos l’añu pasáu. “Va Ser del 15 al 31 d’avientu y n’horariu de 11.30 a 14 y de 17.30 a 21 hores va haber un persona con tarxetes pa los que quieran  colgar los sos suaños. Mientres esi periodu les persones que merquen n’unu los establecimientos acomuñaos a ACOA por importe superior a los 10 euros van poder dexar el so ticket nuna urna, xuntu al árbol, y participar nun sortéu con munchos regalos. Gracies a los alumnos del IES Fleming, autores del cartelu d’anguaño”.

Dende Caixa Bank destacaron el so compromisu de “tar abargana de los veceros y emprestar el nuesu respaldu a los comerciantes. Toos sabemos que pal comerciu la Navidá ye una de les etapes clave del añu. Animar a los ciudadanos a apostar pol comerciu de proximidá”.