Uviéu estudia integrase nuna rede hispanu-lusa de conceyos pa la dinamización cultural y económica del Arcu Atlánticu

L’alcalde d’Uviéu, Wenceslao López, y el conceyal de Cultura, Roberto Sánchez Ramos, aconceyaron esti día col alcalde de Miranda do Douro, Artur Nunes; Mario Correia, Vicepresidente de Associaçon de Lhéngua i Cultura Mirandesa y l’asesor Pablo Canal.

Los representantes lusos propunxeron a Uviéu integrase nuna rede de muncipios hispanu-lusa coles mires de dinamizar cultura y económicamente los territorios del Arcu Atlánticu. L’alcalde del conceyu portugués de Miranda do Douro, Artur Nunes, propunxo esta mañana al alcalde, Wenceslao López y el conceyal de Cultura, Roberto Sánchez Ramos, qu’Uviéu s’integre nuna rede de más d’una docena de conceyos del Arcu Atlánticu que tien como oxetivu la dinamización cultural, económica y empresarial de dichos territorios.

Esta rede hispanu-lusa entama intercambios culturales y comerciales y delles feries en dambos países. Asina, convidaron a participar a la capital asturiana nuna feria que se celebra añalmente na ciudá de Lisboa nel mes de marzu. Tanto’l primer edil como’l responsable de Cultura indicaron a los representantes portugueses que nes príximes selmanes van estudiar la propuesta una vegada hayan recibido toda la documentación.