Uviéu aumenta en 461.000 euros los fondos pa comedor, almuerzu y llibros

La Xunta de Gobiernu d’Uviéu dio lluz verde esti llunes al aumentu en 461.000 euros de los fondos pa beques de comedor, almuerzu y llibros de testu col oxetivu de que nengún neñu que cumpla los requisitos quede ensin les ayudes. Gracies a la medría concediéronse 4.640 beques de comedor, 1.957 ayudes de llibros y 538 d’almuerzu.

Según esplicó la conceyala d’Educación, Merced González, la xubida ye importante, pa llegar a munches más families” qu’en cursos anteriores. La Xunta de Gobiernu aprobó tamién, la llista d’almitíos y escluyíos nesta convocatoria, que podrá consultase a partir del llunes na conceyalía d’Educación y na web municipal.

El presupuestu destináu a les ayudes pa mercar llibros y material escolar aumentó con respectu al cursu 2015-2016, un 144,63%, pasando de 80.000 a 195.700 euros, lo que dexó conceder 1.957 ayudes frente a les 800 de l’anterior convocatoria. El presupuestu de beques comedor, de daqué más de 2.548.610 euros, amontóse en 147.293 euros, dexando atender un total de 4.640 solicitúes, 323 más que nel cursu anterior. Especial fincapié fizo la conceyala d’Educación nes ayudes d’almuerzu, “un finxu históricu” yá que s’ufierten per primer vegada a les families d’Uviéu, y que garanticen non yá el derechu a la educación, sinón tamién que los pequeños tengan “una alimentación equilibrao”. A esta partida destináronse 197.973 euros, colos que se becará a 538 estudiantes.